Rúv vildi Ísraels­menn burt en þeir sluppu með skrekkinn í bili

Samband evrópskra sjónvarpsstöðva EBU kom saman í London í gær og í dag á aðalfundi þar sem þátttaka Ísrael í Söngvakeppni evrópskra sjónvarpsstöðva hefur meðal annars verið til umræðu. Stjórn Ríkisútvarpsins hafði beint þeim tilmælum til Stefáns Eiríkssonar útvarpsstjóra að ef tillaga kæmi fram á fundinum um að vísa KAN, ísraelska ríkisútvarpinu, úr keppninni skyldi Rúv styðja slíka tillögu.

Íslendingar, Slóvenar og Spánverjar eru sagðir hafa staðið í broddi þeirrar fylkingar sem vildi banna Ísraelsmenn frá keppni en ríkisútvörp Austurríkis, Þýskalands og Sviss voru þau einu sem lýstu opinberlega stuðningi við Ísrael, að sögn Ynet.

EBU ákvað þó að kjósa ekki um brottvísun Ísraels úr Eurovision, heldur fresta atkvæðagreiðslunni og framlengja umræðuna.

Þetta þýðir að Ísrael fær í bili að taka þátt í söngvakeppninni. Líklega hefði þeim verið bannað að taka þátt hefði atkvæðagreiðslan farið fram að sögn Jerusalem Post, en ísraelsmenn hefðu samkvæmt því aðeins verið skildir út undan í eitt ár.

Vefmiðillinn Eurovision Fun greinir aftur á móti frá því að málið verði aftur tekið fyrir á fundi samtakanna í vetur. Breska ríkisútvarpið hafi lagt til að lokaákvörðun yrði tekin í vetur, skrifar Eurovision Fun, en sú ákvörðun sé háð því hvernig stríðið þróast. 

Miðillinn bendir á að ákvörðun BBC gæti hafa verið tekin undir áhrifum af nýlegum fréttaflutningi af Glastonbury-hátíðinni, þar sem ummæli eins tónlistarmanns, sem kallaði eftir dauða ísraelskra vígamanna.

Ekki hefur náðst í Stefán Eiríksson útvarpsstjóra við vinnslu fréttar.