Starbucks opnaði á Lauga­vegi í dag

Kaffihúsið sem opnað var í dag er að Laugavegi 66 og annað kaffihús verður svo opnað sem verður líka í miðbænum. Daníel Kári Stefánsson, framkvæmdastjóri Starbucks á Íslandi segist vona að það verði fyrr frekar en seinna. Unnið sé að því að leggja lokahönd á það.

Fram hafði komið að Daníel næði ekki að opna kaffihúsið fyrr en í ágúst, ansi löngu eftir fyrirhugaðan opnunartíma í maí, vegna seinagangs við leyfisveitingar. Regluverk sem tók gildi fyrr á árinu kvað á um að hvert einasta starfsleyfi þyrfti að auglýsa á vef heilbrigðiseftirlitins í fjórar vikur áður en leyfi væri veitt. Hver sem er gæti þá sent inn kvörtun og þá hafði eftirlitið fjórar vikur til að vinna úr þeim. Að öllu þessu loknu gætu veitingamenn þurft að bíða í fjórar vikur í viðbót eftir því að endanleg ákvörðun sé tekin.

Þetta setti Daníel og Starbucks stólinn fyrir dyrnar en í síðasta mánuði afnam Jóhann Páll Jóhannsson umhverfisráðherra reglugerðina og gerði Starbucks kleift að opna í dag.

Í tilkynningu segir Starbucks að á kaffihúsinu sé mikið lagt upp úr því að bjóða upp á hlýlegt rými þar sem gestir geta notið sín og kynnst fyrsta flokks kaffi Starbucks. Sextán manna teymi hafi verið ráðið til starfa sem samanstandi af framkvæmdastjóra, verslunarstjórum, vaktstjórum, stuðningsþjónustu og kaffibarþjónum.

Á kaffihúsinu á Laugavegi verði boðið upp á allt frá vinsælum kaffidrykkjum á borð við karamellu macchiato og frappuccino með hvítu súkkulaði yfir í svalandi drykki úr Starbucks Refresha-línunni. Til viðbótar við fjölbreytt úrval drykkja býður Starbucks upp á veitingar, allt frá samlokum til sætinda og fer öll framleiðsla fram hér á landi. -