Vilja lækka fast­eigna­skatta um tvo milljarða: „Við eigum fyrir þessu“

Tillagan, sem hefur verið birt á vef Reykjavíkurborgar, verður lögð fram á fundi borgarstjórnar á þriðjudaginn. Í henni er lagt til að borgarstjórn samþykki að fela fjármála- og áhættustýringarsviði að undirbúa tillögu að breytingu á fjárhagsáætlun Reykjavíkur þar sem álagningarhlutfall fasteignagjalda á íbúðarhúsnæði og atvinnuhúsnæði lækki þannig að hækkun fasteignamats hafi ekki áhrif til hækkunar gagnvart íbúum og fyrirtækjum og tekjur borgarsjóðs af fasteignagjöldum hækki ekki á milli áranna 2025 og 2026.

Vel á annan milljarð 

Álagningarhlutfall fasteignagjalda á íbúðarhúsnæði verði lækkað úr 0,18 prósent í 0,163 prósent og álagningarhlutfall fasteignagjalda á atvinnuhúsnæði lækki úr 1,6 prósent í 1,536 prósent. Lóðaleiga lækki úr 0,2 prósent í 0,18 prósent.

„Tillagan felur í sér að áætluð lækkun fasteignagjalda á næsta ári nemi rúmum 1,8 milljarði króna og skiptist þannig að tekjur vegna íbúðarhúsnæðis lækki um 857 milljónir, tekjur vegna atvinnuhúsnæðis lækki um 790 milljónir og tekjur vegna lóðaleigu lækki um 171 milljón.“

Eðlilegt að íbúar og fyrirtæki njóti árangursins

Einar Þorsteinsson, oddviti Framsóknar í borginni, segir í samtali við Vísi að nú hafi tekist að snúa við rekstri borgarinnar og síðasta ár hafi borgarsjóður verið rekinn með fimm milljarða króna afgangi.

„Þá er eðlilegt að leyfa borgarbúum og fyrirtækjunum í borginni að njóta árangursins, það munar um tæplega tveggja milljarða skattalækkun. Þessi tillaga er ekki popúlísk, við eigum fyrir þessu,“ segir hann.

Ekki bjartsýnn miðað við ummæli Kristrúnar

Hann segist vona að Samfylkingin og samstarfsflokkar hennar í borginni sjái ljósið og taki þátt í því að lækka skatta á íbúa en vissulega sé hann ekki bjartsýnn á það.

„Miðað við síðustu ummæli Kristrúnar Frostadóttur forsætisráðherra þá hyggst Samfylkingin hækka skatta á borgarbúa með sérstöku auðlindagjaldi á hitaveitu. Það eru grafalvarleg tíðindi en koma ekki á óvart því stefna Samfylkingarinnar virðist vera að hækka sífellt skatta, hvort sem það er á vettvangi ríkisstjórnarinnar eða hér í Reykjavík.“

Þar vísar Einar til ummæla sem Kristrún lét falla á opnum fundi sem Samfylkingin stóð fyrir á Ísafirði í gær. Þar spurði íbúi hvers vegna íbúar höfuðborgarsvæðisins væru ekki rukkaðir um auðlindagjald af jarðhita. Auðlindamál voru einmitt talsvert til umræðu á fundinum, sér í lagi hvað boðaða hækkun veiðigjalda varðar.

Morgunblaðið hafði í morgun eftir Kristrúnu á fundinum að ríkisstjórn hennar ynni nú að því að setja á heildstæða auðlindastefnu, sem myndi meðal annars fela í sér auðlindagjöld af jarðhita.

„Það er verið að skoða þá leið að jafna það milli svæða, þó það þýði að ein­hver á höfuðborg­ar­svæðinu þurfi að borga aðeins meira.“