Í­búar í Kópa­vogi með öryggis­mynda­vélar hafi sam­band við lög­reglu

Þetta kemur fram í fréttatilkynningu frá lögreglunni á höfuðborgarsvæðinu.

 Þá eru íbúar í hverfinu og Kópavogi beðnir um að skoða nærumhverfi sitt, sem sagt geymslur, stigaganga og garðskúra. Þau sem eru í forsvari fyrir auðu húsnæði í Kópavogi eru beðin um að skoða slíka staði. 

Samkvæmt upplýsingum frá leitaraðilum mun björgunarsveitarfólk dreifa miðum til íbúa á Digraneshæð nú síðdegis, með leiðbeiningum um að athuga í öryggismyndavélar sínar, sé það með slíkar. Svæðið sem miðunum verður dreift á er ákvarðað út frá þar til gerðum líkindahring sem reiknaður hefur verið út, og nær yfir svæðið sem talið er líklegt að Sigríður hafi ferðast um. 

Þau sem geta gefið upplýsingar um ferðir Sigríðar eru beðin að hafa samband við lögregluna í síma 112 eða 444-1000 eða með tölvupósti á netfangið 100@lrh.is.

Ásgeir Þór Ásgeirsson, aðstoðarlögreglustjóri á höfuðborgarsvæðinu, staðfesti í samtali við fréttastofu í dag að leit að Sigríði héldi áfram í dag. Lögregla hefur lýst eftir henni síðan á laugardagskvöld.

„Við erum bara að skoða þær vísbendingar sem við höfum fengið síðan við lýstum eftir viðkomandi. Svo eru fundarhöld í dag til að skipuleggja hvað við leggjum áherslu á að gera næst,“ sagði Ásgeir í samtali við fréttastofu.

Leitinni var frestað síðdegis í gær eftir að hafa ekki borið árangur. Þá sagði Jón Þór Víglundsson upplýsingafulltrúi Landsbjargar í samtali við fréttastofu að framvegis sé í höndum lögreglu að boða leit á ný.

Um fimmtíu manns tóku þátt í umfangsmikilli leit að henni aðfaranótt sunnudags.