„Það er svo mikið rugl í gangi“

Neytendastofa birti á dögunum ákvarðanir í málum fjögurra fyrirtækja með gjaldskyld bílastæði. Upplýsingagjöf og viðskiptahættir væru ekki í samræmi við lög enda ekki veittar upplýsingar um öll gjöld lögð á neytendur og stjórnvaldssektum beitt.

Langflestar kvartanir vegna bílastæðafyrirtækja

Neytendasamtökin segja langflestar kvartanir til þeirra varða vangreiðslugjöld umræddra fyrirtækja sem séu ólögmæt að mati samtakanna.

„Við teljum að þetta séu innheimtugjöld og þá þarf að fara eftir innheimtulögum og það þarf að senda innheimtuviðvörun áður en þú leggur á vangreiðslugjald. Þetta eru óskýrir samningsskilmálar. Þú veist ekki þegar þú leggur í stæði að það komi vangreiðslugjald. Þá brýtur þetta einnig gegn lögum um neytendasamninga og gegn samningalögum,“ segir Breki Karlsson, formaður Neytendasamtakanna.

Breki biðlar til fólks sem hefur greitt vangreiðslugjöld vegna bílastæða að krefjast endurgreiðslu í ljósi ákvarðananna. Á vefsíðu samtakanna er búið að útfæra tölvupóst til að senda á umrædd fyrirtæki.

Afrita og líma reglugerð frá Danmörku 

„Það er svo mikið rugl í gangi varðandi þessi bílastæðamál. Einhvers konar villta vestrið þar sem allir og ömmur þeirra ætla reyna að græða. Við verðum að koma einhverjum böndum á þetta. Við höfum nú þegar skorað á stjórnvöld að þau setji skýrari reglur. Líkt og er í Danmörku til dæmis. Við þurfum ekkert að finna upp hjólið. Við getum bara notað google translate næstum því.“

Vangreiðslugjöldin leggist ekki aðeins á óprúttna aðila sem svíkjast til að leggja í stæði heldur geta verið ýmsar ástæður fyrir því að þau eru lögð á löghlýðna borgara.

„Það getur verið að það hafi verið örlítið lengur en það ætlaði sér á staðnum, Það getur verið að bílastæðakassinn sem þú borgaðir hafi verið bilaður, forritin eru biluð, þú greiður röngum aðila. Forritið er kannski skakkt og sýnir þig staddan á öðrum stað en þú ert í raun og veru og þú greiðir öðru fyrirtæki. Þetta brask með bílastæði, það verður bara að fara burt.“