Stólaleikur í Svörtu­loftum

Í tilkynningu á vef Seðlabankans segir að Sturla Pálsson, sem gengt hafi stöðu framkvæmdastjóra markaðsviðskipta, síðastliðin tuttugu ár taki við sem forstöðumaður skilavalds Seðlabanka Íslands. Haukur C. Benediktsson, sem gengt hafi stöðu framkvæmdastjóra fjármálastöðugleikasviðs, sé settur framkvæmdastjóri markaðsviðskipta og Flóki Halldórsson, sem gegnt hafi stöðu forstöðumanns skilavalds, sé settur framkvæmdastjóri fjármálastöðugleika.

Sturla hafi starfað samfleytt í Seðlabanka Íslands frá árinu 2001. Áður hafi hann starfað í Íslandsbanka, hjá Hagstofunni og þar áður í Seðlabankanum. Árið 2005 hafi hann orðið framkvæmdastjóri sviðs markaðsviðskipta í Seðlabankanum og gegnt þeirri stöðu síðan. Sturla hafi um tíma setið í stjórn Eignasafns Seðlabanka Íslands ehf. Sturla sé með BS-próf í hagfræði frá Háskóla Íslands og masterspróf í fjárfestingastjórnun frá Háskólanum í Reykjavík.

Haukur hafi hafið störf í Seðlabankanum árið 2001 og starfað til ársins 2006 en verið ráðinn aftur til bankans í janúar 2009. Hann hafi sinnt starfi framkvæmdastjóra Eignasafns Seðlabanka Íslands ehf. frá janúar 2013 allt þar til félagið var lagt niður í febrúar 2019. Síðastliðin ár hafi Haukur gegnt starfi framkvæmdastjóra fjármálastöðugleikasviðs Seðlabanka Íslands. Haukur sé með B.Sc. gráðu í hagfræði frá Háskóla Íslands og M.Sc. gráðu í fjármálum og hagfræði frá London School of Economics.

Flóki hafi starfað í aldarfjórðung á fjármálamörkuðum og í Seðlabanka Íslands. Síðustu fimm ár hafi hann veitt forstöðu skrifstofu skilavalds hjá Seðlabanka Íslands. Áður en hann gekk til liðs við Seðlabankann hafi hann verið framkvæmdastjóri sjóðafyrirtækisins Stefnis um tíu ára skeið. Flóki sé með Executive MBA gráðu frá Copenhagen Business School og hafi lokið grunnnámi í hagfræði við Háskóla Íslands.