Reisa tuttugu bekki til minningar um Bryn­dísi Klöru

Bekkur til minningar um Bryndísi Klöru Birgisdóttur var afhjúpaður við Salalaug í Kópavogi í dag. Bekkurinn er sá fyrsti af alls tuttugu bekkjum sem settir verða upp við íþróttamannvirki og skóla í Kópavogi á næstu vikum.

Kópavogsbúinn Steinar Guðmundsson á frumkvæðið að verkefninu en það hlaut brautargengi í gegnum samráðsverkefnið „Okkar Kópavogur“ þar sem íbúar bæjarins gátu kosið um úthlutun fjármagns til smærri nýframkvæmda og viðhaldsverkefna í bænum.

„Hugmyndin í rauninni kemur þegar ég sá að samkeppnin fór af stað. Þetta var eitthvað sem snerti alla þessi atburður og ég velti fyrir mér hvernig væri hægt að vera með áminningu alltaf og þetta var lausnin,“ sagði Steinar þegar bekkurinn af afhjúpaður í dag.

„Sjálfur á ég dætur á þessum aldri og vildi reyna að kenna þeim og minna aðra á að fara varlega. Ég vona að þetta verði áminning fyrir krakkana í hverfinu.“

Steinar var ánægður með útkomuna en sagði fyrstu drög að bekknum hafa verið teiknuð með hjálp gervigreindar.

„Bekkurinn er alveg frábær, þetta kemur ótrúlega svipað út og ég er ánægður með útkomuna. Gaman að þetta geti verið í litunum hennar Bryndísar Klöru og ég er mjög stoltur af þessu,“ bætti Steinar við.

Vona að verkefnið hjálpi til í baráttunni gegn ofbeldi

Foreldrar Bryndísar Klöru, Birgir Karl Óskarsson og Iðunn Eiríksdóttir, segja framtak sem þetta hafa mikla þýðingu. Þau voru viðstödd afhjúpunina í dag ásamt Ásdísi Kristjánsdóttur bæjarstjóra Kópavogs og Friðriki Baldurssyni garðyrkjustjóra.

„Þetta er ótrúlega falleg hugmynd sem Steinar kom með í september. Okkur finnst frábært að Kópavogsbúar hafi kosið, bæði í efri og neðri byggðum, að hafa svona fallega minningu um Bryndísi okkar,“ sagði Birgir Örn í dag.

Iðunn bætti við að hún vonaðist til að verkefnið hefði forvarnargildi í framtíðinni.

„Maður er að vona að krakkar hugsi til hennar og að svona eigi ekki að gerast. Að þetta hjálpi í baráttunni gegn ofbeldi.“