Kona látin eftir stunguárás í Noregi

Frá þessu greinir Verdens gang.

Þar segir að tengsl hafi verið milli konunnar og karlsins, en lögreglan vilji ekki upplýsa um frekari smáatriði að svo stöddu. Í skýrslu lögreglunnar frá vettvangi stendur eftirfarandi:

„Það var sagt að karlmaðurinn hefði verið með hníf. Þegar lögreglu bar að garði, var einn slasaður og annar var með hníf. Hinn síðarnefndi var skotinn af lögreglumönnum.“

Norsku lögreglunni barst tilkynning um atvikið klukkan 10:46 að staðartíma í morgun. Þegar lögreglu bar að garði var konan þungt haldin af sárum sínum, og var hún flutt á spítala til aðhlynningar. Hún lést klukkan 13:30 að staðartíma.

Lögreglan hefur lagt hald á hlut sem líklegt er að hafi verið notaður við verknaðinn, sem ætla má að sé hnífur.

Hinn grunaði er nú á spítalanum og verður yfirheyrður þegar hann hefur heilsu til.

Mats Henriksen, lögfræðingur hjá norsku lögreglunni segir að maðurinn hafi þegar verið ákærður fyrir morð. Hann segir að fjölmörg vitni hafi verið á vettvangi.

„Það er eitt vitni sem hlutaðist til meðan á þessu stóð, og það er verið að yfirheyra eina manneskju,“ segir Henriksen. Lögreglan vilji ekki tjá sig frekar um málið að svo stöddu.