Sam­þykktu að bæta við leið fyrir stóra fjár­festa í sölu Ís­lands­banka

Stefnt er að því að sala á þeim 42,5 prósent hlutabréfa í Íslandsbanka í eigu ríkisins fari fram á fyrri helmingi þessa árs. Almenningur á að hafa forgang í útboðinu og verður tryggt lægsta verðið á hlutum.

Breytingarnar sem voru samþykktar á þingi í dag fela það í sér að þriðju tilboðsbókinni svonefndu verði bætt við, tilboðsbók C. Hún veitir eftirlitsskyldum fagfjárfestum sem gera tilboð fyrir eigin reikning með eignir umfram 70 milljarða króna hefðbundnanara úthlutunarferli.

Með þessu móti er vonast til þess að fleiri bréf seljist og stórir fjárfestar taki virkari þátt í útboðinu án þess að það gangi á forgang einstaklinga. Verð á bréfum verður það sama og í tilboðsbók B sem er ætluð lögaðilum og almenningi en tilboð þurfa að nema að lágmarki 300 milljónum króna.

Aðeins almenningur getur gert tilboð í tilboðsbók A og nýtur hann forgangs. Hlutirnir þar verða á föstu verði og tekið er við tilboðum allt að tuttugu milljónum króna.

Í tilboðsbók B geta lögaðilar og almenningur boðið í hluti, þó aldrei á lægra verði en í A-bók. Lágmarkstilboð þurfa að nema tveimur milljónum króna.

Stórir eftirlitsskyldir fagfjárfestar geta gert tilboð í tilboðsbók C. Þar er tekið við tilboðum í kjölfar markaðsþreifinga fyrir útboð. Markaðsþreifingarnar eru sagðar miða að því að fá stóra eftirsóknarverða fagfjárfesta að borðinu til að tryggja sem mesta eftirspurn í útboðinu. Þessir aðilar verða að uppfylla það skilyrði að samanlögð fjárhæð eigna þeirra í stýringu sé jafnvirði 70 milljarða króna eða hærra. Verð í tilboðsbók C er hið sama og myndast í tilboðsbók B.

Miklar deilur sköpuðust eftir síðasta útboð ríkisins á hlutum sínum í Íslandsbanka. Bjarni Benediktsson, þáverandi fjármálaráðherra, sagði meðal annars af sér því embætti eftir að umboðsmaður Alþingis dró hæfni hans til að selja hlutina í efa í október 2023. Faðir Bjarna var einn þeirra sem fékk að kaupa hluti í bankanum.

Alþingi samþykkti lög um sölu á eftirstandandi hlutum ríkisins í bankanum í fyrra. Var þeim sagt ætlað að tryggja að hlutlægni, hagkvæmni, jafnræði og gagnsæi yrði viðhöfð við framkvæmdina á útboðsferlinu.