Lygin lekur niður á hökuna

Eftir að Sigurbjörgu, fimmtugri dóttur minni og langt gengnum fíkli, var fleygt út á gangstéttina við Bríetartún í gærmorgun brá skyndilega svo við að bæði Vísir og DV náðu tali af Sigrúnu Árnadóttur, framkvæmdastjóra Félagsbústaða. Eftir að hafa lesið þessi viðtöl sat ég nokkra stund og horfði á myndina af þessari konu. Og ég gat ekki að því gert, að mér þótti ég sjá lygina leka niður hökuna á henni, líkt og þegar smábörn slefa.

Það var nefnilega harla fátt af því sem hún hafði að segja, sem er sannleikanum samkvæmt, kannski einna helst það að allir þurfi að borga leigu. Við skulum grípa niður í viðtalið í DV:

„DV spurði Sigrúnu út í tvö tengd mál sem hafa verið í fréttum undanfarna daga. Annars vegar er það framganga eins leigjandans, síbrotakonu sem heldur nágrönnum sínum í heljargreipum ofbeldis, þjófnaða og skemmdarverka. Hins vegar er það mál Sigurbjargar Jónsdóttur, leigjanda í húsinu, sem borin var út úr íbúð sinni í dag …“

Svarið er skráð svona í DV:

„Ég get því miður ekki talað opinberlega um málefni tiltekinna einstaklinga, en bæði þessi mál eru í vinnslu. Í öllum tilvikum þarf að fylgja ákveðnum lögum og reglum varðandi húsreglnabrot og önnur brot og við erum að fylgja því. […]

Að útburðarmálið sé í vinnslu er auðvitað haugalygi. Því var lokað með níðingsverkinu í gærmorgun. Sé hitt málið í einhvers konar vinnslu hefur sú vinnsla staðið yfir í meira en tvö ár. Ég sé í minnispunktum mínum, að það hefur verið 3. ágúst 2023, sem ég lagði leið mína í höfuðstöðvar Félagsbústaða til að ræða mögulega flutning Sigurbjargar, dóttur minnar, í skárra húsnæði. Ég talaði þá við konu sem greinilega gegndi einhverri stjórnunarstöðu og henni reyndist mætavel kunnugt um ástandið í stigaganginum.

Ef Sigrún telur sig vera að fylgja lögum og fylgja eftir og reglum um húsreglnabrot er hún annaðhvort að segja vísvitandi ósatt eða hún er fullkomlega ófær um að gegna þessu starfi. Og reyndar getur þetta tvennt farið ágætlega saman.

Spurð hvort hún kannist við að meðal leigjenda Félagsbústaða séu einstaklingar, sem geti verið hættulegir umhverfi sínu, svarar hún:

„Ef það eru einstaklingar sem eru hættulegir öðrum þá þurfa að vera þannig aðstæður að hægt sé að tryggja öryggi annarra.En við erum í sambandi við fólkið og erum að vinna þetta eftir bestu getu. Það er kannski ekki alveg nægjanlegt.”

Við skulum gefa framkvæmdastjóranum prik fyrir að vita að nauðsynlegt sé að tryggja öryggi fólks, en að Félagsbústaðir séu í sambandi við íbúa og reyni að vinna úr málum eftir bestu getu, virðist í allra besta lagi vera bull. Og í síðustu málsgreininni er orðinu ”kannski” algerlega ofaukið.

Þótt lítilvægt sé, má halda því til haga að Félagsbústaðir létu þrífa stigaganginn um sjöleytið í gærmorgun – í fyrsta sinn í manna minnum var efnislega haft eftir einum íbúanum. Eftir athygli fjölmiðla daginn áður hefur sennilega þótt rétt að gera fínt áður en ljósmyndarar mættu á staðinn.

Reyndar vill svo huggulega til að Sigrún Árnadóttir gæti sjálf átt á hættu að vera ”borin út” af vinnustað sínum, þar sem hún er sökuð um ógnarstjórn og vanvirðingu. Í vetur var hún spurð að því á starfsmannafundi hvort ekki stæði til að kynna niðurstöður nýjustu starfsánægjukönnun Sameykis. Svar Sigrúnar var einfalt. Hún rak spyrjandann úr vinnunni þar og þá – á fundinum, fyrir framan starfsfólkið.

Samkvæmt frásögn Vísis brást stjórn Félagsbústaða við kvörtunum starfsfólks á hefðbundinn hátt, þegar í hlut á fólk með yfir tvær milljónir í mánaðarlaun. Stjórnin samdi við Auðnast, ráðgjafarfyrirtæki um heilsu og vinnuvernd, um að ”greina umhverfið á vinnustaðnum og vinna áhættumat.”

Hvernig væri nú að stjórnin réði þetta fyrirtæki til að greina umhverfið í Bríetartúni 20 og vinna áhættumat? Er fólki nokkuð mismunað eftir tekjum, stétt eða stöðu hjá stjórn Félagsbústaða?

En mál Sigrúnar er greinilega í vinnslu.

Tenglar:

Viðtal DV við Sigrúnu: https://www.dv.is/frettir/2025/5/6/framkvaemdastjori-felagsbustada-um-astandid-brietartuni-thetta-er-sannarlega-ekki-god-stada/

Frásögn Vísis af máli Sigrúnar: https://www.visir.is/g/20252700672d/skyndilegur-brottrekstur-kornid-sem-fyllti-maelinn

Höfundur er gamalmenni