Ó­skiljan­legt að ASÍ beini spjótum sínum að lítilli hverfis­verslun

Í morgun barst fjölmiðlum fréttatilkynning frá verðlagseftirliti ASÍ þess efnis að Melabúðin hefði hafnað þáttöku í verðlagseftirlitinu. Áður en sú afstaða hefði orðið ljós hefði verðtaka verið framkvæmd, síðast í janúar síðastliðnum, en samkvæmt þeirri athugun hafi Melabúðin verið 43 prósentum dýrari en Bónus að meðaltali, þegar tæplega 700 vörur voru skoðaðar.

Dýrleif Birna Sveinsdóttir, verslunarstjóri Melabúðarinnar, hefur nú svarað ASÍ fyrir hönd verslunarinnar með yfirlýsingu.

„Melabúðin er sérverslun með sælkeravörur og hefur í gegnum tíðina ekki verið hluti af verðlagseftirliti ASÍ, enda er rekstur einnar hverfisverslunar í vesturbæ Reykjavíkur allt annars eðlis en stórra verslanakeðja.“

Eftirlitið teikni upp skakka mynd

Í yfirlýsingunni segir að Melabúðin sérhæfi sig í fjölbreyttri matvöru, þar á meðal kjöti og fiski, sem unnin sé á staðnum af fagfólki og eftir óskum viðskiptavina. Ferskleiki, gæði og persónuleg þjónusta séu í forgrunni og geri Melabúðina einstaka í íslensku verslunarumhverfi, sem samhliða bjóði upp á dagvörur sem spari fjölskyldum sporin í innkaupum fyrir heimilin.

„Samanburður á verði án tillits til gæða, þjónustu og vöruvals dregur upp skakka mynd og tekur ekki tillit til sérstöðu sérverslana eins og Melabúðarinnar í samkeppni við stórar verslanakeðjur. Stórmarkaðir geta í krafti stærðar sinnar keypt vörur í miklu magni á lægra verði. Melabúðin keppir á hinn bóginn á grundvelli mikillar útsjónarsemi, miklum gæðum og persónulegrar þjónustu. Viðskiptavinir okkar kjósa að versla í sínu nærumhverfi og hefur búðin verið hluti af líflegri hverfismenningu, sem teygir anga sína jafnvel um allt höfuðborgarsvæðið.“

Vegi að hagsmunum starfsfólks og viðskiptavina

Rétt sé að taka fram að starfsfólki ASÍ hafi aldrei verið vísað á dyr og um þetta fyrirkomulag hafi ríkt gagnkvæmur skilningur. Þessi háttur sé þekktur í öðrum geirum atvinnulífsins, eins og fjölmiðlum, sem sumir kjósi að taka ekki þátt í samræmdum mælingum á notkun miðlanna þar sem stjórnendur þeirra telji mælingarnar gefa skakka mynd af markmiðum rekstrarins. 

„Það er því óskiljanlegt að starfsfólk ASÍ kjósi á þessum tímapunkti að hnýta í litla hverfisverslun í Reykjavík, vega að hagsmunum starfsfólks og þjónustu við fjölskyldur í stað þess að beina spjótum sínum að þeim sem öllu ráða á dagvörumarkaði.“

Stjórnendur og starfsfólk Melabúðarinnar sé gríðarlega þakklátt viðskiptavinum fyrir traustið og stuðninginn í gegnum tíðina og muni halda áfram að leggja áherslu á gæði, góða þjónustu og þá einstöku stemningu sem hafi laðað að sér trygga viðskiptavini í áraraðir.