Síðasti rampurinn vígður við Há­skóla Ís­lands í dag

Í tilkynningu kemur fram að frá því að verkefnið hófst árið 2021 hafi verið reistir 1.756 rampar víðs vegar um landið. Upphaflegt markmið var að bæta aðgengi hreyfihamlaðra að byggingum vítt og breitt um landið með uppbyggingu 1.000 rampa sem síðan var aukið í 1.500 rampa. Heildarfjöldi rampa fór þannig fram úr þeim áætlunum. Verkefnið hefur auk þess unnist á methraða samkvæmt tilkynningu og er lokið ári á undan áætlun.

Viðburðurinn í dag hófst með vígslu síðasta rampsins við Aðalbyggingu Háskóla Íslands. Í kjölfarið tók við dagskrá í Hátíðasal HÍ þar sem stuðningsaðilar verkefnisins og gestir komu saman til að fagna þessum merka áfanga.

Á hátíðinni flutti fjöldi fólks ávörp sem komið hefur að verkefninu með einum eða öðrum hætti. Til máls tóku Guðni Th. Jóhannesson, fyrrverandi forseti Íslands, Eyjólfur Ármannsson samgöngu- og sveitastjórnaráðherra, Katrín Jakobsdóttir, fyrrverandi forsætisráðherra, Dagur B. Eggertsson, alþingismaður og fyrrverandi borgarstjóri í Reykjavík, Jón Atli Benediktsson háskólarektor, Bryndís Thors grunnskólanemi og Haraldur Ingi Þorleifsson, stofnandi verkefnisins og aðalbakhjarl. Einnig voru í boði tónlistatriði frá KK, krökkum á leikskólanum Bakkaborg og félögum úr Lúðrasveit Reykjavíkur.

„Aðgengismál eru grundvallarmál í háskólastarfinu því jafnt aðgengi að háskólamenntun felur jafnframt í sér jafnt aðgengi að tækifærum samfélags og atvinnulífs. Þannig eru aðgengismál í skólastarfi eitthvert áhrifamesta samfélagslega jöfnunartæki sem völ er á. Mér skilst að á háskólasvæðinu einu hafi verið gerðir heilir 210 rampar í þessu átaki, Römpum upp Ísland. Það munar um minna,“ er haft eftir Jóni Atla Benediktsyni, rektor Háskóla Íslands, í tilkynningu.

Í tilkynningu segir að verkefnið hafi frá upphafi haft jákvæð áhrif á lífsgæði ótal margra en með því hefur markvisst verið unnið að því að gera byggingar um landið allt aðgengilegri fyrir öll. Fram að þessu hafa flestir rampanna verið byggðir við byggingar einkaaðila en síðustu áfangar verkefnisins hafa verið í samstarfi við opinbera aðila.

„Með því að vinna saman með ótal aðilum, alls staðar að úr samfélaginu, byggðum við 1.756 rampa. Það eru 1.756 staðir sem fólk sem notar hjólastól getur núna farið að borða, læra, hlæja, versla, kyssast, lifa. Gleðin var við stýrið alla ferðina og gleðin skilaði okkur miklu lengra en bjartsýnustu spár. Takk fyrir okkur,“ sagði Haraldur Ingi Þorleifsson, stofnandi verkefnisins þegar hann rakti sögu þess og áhrif í HÍ í dag.

Síðasti rampurinn er stærstur

Rampurinn sem var vígður í dag við Aðalbyggingu HÍ er sá stærsti en á vefsíðunni rampur.is er að finna upplýsingar um alla rampa sem hafa verið reistir og annað sem rampagerðinni viðkemur.

Hópurinn, sem stendur að verkefninu, heldur áfram að sinna sérverkefnum sem stuðla að bættu aðgengi, meðal annars að innviðum í Lágafellslaug í samvinnu við Mosfellsbæ og að bættu aðgengi að veitingastöðum við Geirsgötu í samvinnu við Reykjavíkurborg.