Hættu­legustu gatna­mótin við Miklu­braut

Skráð tjón hjá Sjóvá í umferðinni á síðasta ári voru 336 talsins á Miklubraut. Stærstur hluti þeirra átti sér stað við þessi tvö gatnamót. Tjónið skiptist í 69 kaskótjón og 267 ábyrgðartjón.

Miðað gögn Sjóvá eru gatnamótin við Miklabraut og Grensásveg hættulegust með tilliti til slysa og óhappa en gatnamótin við Miklabraut og Kringlumýrarbraut hættulegust með tilliti til slysa.

Við gatnamótin við Kringlumýrarbraut ekur fólk inn að Kringlunni og út í nágrannasveitarfélög Reykjavíkur. Við gatnamótin við Grensásveg ekur fólk svo annað hvort inn í Smáíbúðahverfi og í átt að Fossvogi eða inn í Skeifuna.

Miklarbraut er þjóðvegur í þéttbýli og er á ábyrgð Vegagerðar. Miklabraut tekur við af Hringbraut við Hlíðarnar og verður svo að Nesbraut/Vesturlandsvegi við gatnamót við Sæbraut.

Hrefna Sigurjónsdóttir, verkefnastjóri forvarna hjá Sjóvá fór yfir þessi mál í Bítinu í morgun. Hún segir mikla umferð um Miklubrautina, hún sé einskonar lífæð borgarinnar, og það geti auðvitað skýrt fjölda tjóna og slysa við gatnamótin.

Mikill kostnaður við tjón og slys

„Þetta eru umferðarþung gatnamót en þau eru líka ljósastýrð sem þýðir að það er kannski meiri hraði en ef þetta væri hringtorg eða eitthvað þannig,“ segir Hrefna og það geti til dæmis skýrt fjölda tjóna, óhappa og slysa.

Hrefna segir alltaf mikinn kostnað við að lenda í óhappi. Það kosti mikið að laga bíla og meira yfirleitt en kannski fólk gerir sér grein fyrir.

„Svo er kostnaður af meiðslum langvinnur og erfitt að meta hann fyrr en miklu seinna. Það er auðvitað það sem skiptir mestu máli, að koma í veg fyrir slys af fólki.“

Kostnaðurinn hjá Sjóvá vegna tjóna á þessum gatnamótum er verulegur. Um 65 prósent tjónanna er vegna aftanákeyrslna og Hrefna segir það oft vegna þess að fólk er ekki með hugann við aksturinn. Það sé freistandi í hægri umferð að fikta í símanum en það sé ólöglegt og mikilvægt að hafa fulla athygli við aksturinn.

Þá segir hún um tíu prósent tjóna vegna þess að fólk er að skipta um akrein.

Miklabrautin verði að jarðgöngum

Bryndís Friðriksdóttir, svæðisstjóri hjá Vegagerðinni, segir fjölda tjóna og slysa líklega tengjast mikilli umferð á þessum gatnamótum. Það sé ljósastýring á þeim og vinstri beygjur varðar eins og Vegagerðin vilji hafa það þannig á stórum og þungum gatnamótum. Það sé á verkefnalista Vegagerðarinnar að laga gönguleiðir við þessi gatnamót. 

Hún segir gatnamót Miklubrautar og Háaleitisbrautar einnig til skoðunar og gatnamót Kringlumýrarbrautar og Háaleitisbrautar og hinn endann í framhaldinu.

Bryndís bendir á að samkvæmt samgöngusáttmálanum sé svo gert ráð fyrir að Miklabrautin verði að jarðgöngum frá Grensásvegi og að Landspítala. Þannig færist stór hluti þessarar umferðar neðanjarðar. Samkvæmt framkvæmdaáætlun er þó ekki gert ráð fyrir að framkvæmdir við jarðgöngin hefjist fyrr en 2033 og taki í það minnsta fimm ár.

„Þá minnkar umferðin þarna í gegn töluvert af því að hluti fer neðanjarðar. Þá verður gatnakerfið rólegra og viðráðanlegra ofan jarðar, fyrir akandi, gangandi og hjólandi,“ segir Bryndís og að umhverfið ofan á verði lagað með tilliti til þess.