Segir Selenskí á leið til Washington

Eins og frægt er hefur Trump krafist þess að Úkraína greiði Bandaríkjunum fyrir þá hernaðaraðstoð sem ríkið hefur fengið til að verjast innrás Rússa og hefur Trump logið því að um fimm hundruð milljarða dala sé að ræða.

Sjá einnig: Kallar Selenskí einræðisherra og varpar fram lygum

Selenskí hefur hingað til neitað því að skrifa undir samkomulag við Bandaríkin.

Hefur hann meðal annars vísað til þess að Úkraína hefur fengið mun minna en fimm hundruð milljarða dala frá Bandaríkjunum og sagt það ósanngjarnt að krefja Úkraínumenn um endurgreiðslu á aðstoð, eftir á. Ekki hafi upprunalega verið samið um slíkt.

Sjá einnig: Neitaði að skrifa undir plagg Trumps um sjald­gæfa málma

Þá hefur hann einnig gagnrýnt að Bandaríkjamenn vilji ekki veita neins konar öryggistryggingar með samkomulaginu og sagt að hann muni ekki skrifa undir samkomulag sem skuldsetji komandi kynslóðir Úkraínumanna.

Í færslu sem hann skrifaði á Truth Social, hans eigin samfélagsmiðil, talaði Trump um „tugi milljarða dala og hergögn“ sem Úkraínumenn hafa fengið, í stað fimm hundruð milljarða dala.

Hann sagðist einnig hafa átt í „alvarlegum“ viðræðum við Vladimír Pútín, forseta Rússlands, um það að binda enda á stríðið og umfangsmikil viðskipti milli Bandaríkjanna og Rússlands. Hann sagði þær viðræður ganga vel.

Greiddu atkvæði með Rússum og Norður-Kóreu

Allsherjarþing Sameinuðu þjóðanna samþykkti í dag ályktun Úkraínu og Evrópusambandsins þar sem þess var krafist að Rússar drægju herlið sitt til baka frá Úkraínu.

Alls greiddu erindrekar 93 ríkja atkvæði með ályktuninni, 65 sátu hjá en átján sögðu nei. Meðal þeirra sem sögðu nei voru Norður-Kórea, Rússland, Belarús, Ungverjaland og Ísrael. Kína, Íran og Kúba voru meðal þeirra sem sátu hjá.

Sjá einnig: Af­tökur á stríðs­föngum sagðar kerfis­bundnar

Bandaríkjamenn lögðu fram eigin ályktun þar sem fjallað var um að binda enda á stríðið í Úkraínu og Rússlandi en þar var ekki tekið fram að Rússar hefðu gert innrás í Úkraínu. Þeirri ályktun var hafnað.

Trump hefur sagt berum orðum að hann telji Úkraínumenn, Bandaríkin og Atlantshafsbandalagið bera ábyrgð á innrás Rússa í Úkraínu og hefur verið harðlega gagnrýndur fyrir það.

Sjá einnig: Væntanlegur kanslari segir Evrópu þurfa sjálfstæði frá Bandaríkjunum

Trump og erindrekar hans hafa sagt að ríki Evrópu muni koma að því að veita Úkraínumönnum öryggistryggingar. Bandaríkjamenn muni ekki koma þar nærri og ítrekaði hann það í dag.

Hann sagðist hafa rætt málið við Vladimír Pútín, forseta Rússlands, og að hann hafi ekki sett sig gegn því að evrópskir hermenn yrðu sendir til Úkraínu ef og þegar stríðinu lýkur.

Emmanuel Macron, forseti Frakklands, er í Washington þar sem hann fundaði með Trump í dag. Hann sagði að Frakkar og Bretar hefðu rætt sín á milli um áætlun um að senda hermenn til Úkraínu eftir stríðið. Þeir gætu tekið þátt í því að tryggja öryggi.