Borgin hafi ekki brugðist nógu hratt við í Breiðholtsskóla

Starfsfólk og foreldrar hafa sakað borgina um algjört úrræða- og athafnaleysi en Steinn segir málið á borði skóla- og frístundasviðs og að allra leiða sé nú leitað til að finna viðeigandi úrræði handa gerendum, þolendum og aðstandendum. Nauðsynlegt sé að grípa fljótar inn í, auka mannafla í skólum borgarinnar og bæta íslenskukennslu barna af erlendu bergi brotinna svo að slík mál endurtaki sig ekki.

„Við þurfum að grípa fljótar inn í, senda fleiri inn í skólana til að aðstoða áður en málin fara í þennan farveg sem þau eru í núna og enda í fjölmiðlum,“ segir Steinn.

Börn þori ekki í skólann

Undanfarna daga hefur verið fjallað mikið um það ógnarástand sem komið er upp í einum árgangi Breiðholtsskóla. Fram hefur komið að þar ríki ógnarástand þar sem líkamlegt, andlegt og kynferðislegt ofbeldi sé við lýði. Faðir stúlku í skólanum sagði í viðtali í Bítinu á Bylgjunni í gærmorgun að fámennur hópur haldi sjöunda bekk skólans í heljargreipum. Ástandið væri orðið það slæmt að börn þyrðu ekki í skólann af hræðslu.

Sjá einnig: Börnin líði fyrir „á meðan stjórn­völd fljóta sofandi að feigðar­ósi“

Í yfirlýsingu sem kennarar, skólaliðar og annað starfsfólk Breiðholtsskóla gaf frá sér í gær segja þeir fullyrðingar starfsmanna skóla- og frístundasviðs Reykjavíkurborgar um að þeir kannist ekki við ástandið vera í hrópandi ósamræmi við þá upplýsingagjöf sem verið hefur á undanförnum misserum og harma úrræðaleysi og athafnaleysi stjórnvalda.

Vandinn ekki bundinn við skólann

Steinn Jóhannsson segir að sér hafi brugðið mjög þegar það komst í fréttir fyrir einhverjum dögum síðan en hann er nýtekinn við starfi sviðsstjóra. Hann hafi notað vikuna til að setja sig inn í málið og leita lausna.

„Á föstudaginn funduðum við á sviðinu með skólastjórnendum í Breiðholtsskóla og fagstjóra í miðstöðinni í hverfinu. Við fórum yfir málin og vorum að ræða aðgerðir sem við gætum nýtt til að bregðast við. Ég er líka búinn að hitta foreldra sem tengjast málinu og hlusta á þau og fara yfir málið. Ég er kominn með nokkuð góðan skilning á því sem er að gerast þarna,“ segir hann.

Sjá einnig: „Of­beldið er enn þá al­var­legra en fólk heldur“

Steinn segir þá að vandinn sé ekki bundinn við skólann heldur samfélagið í heild.

„Mín fyrstu viðbrögð er að við þurfum fleiri úrræði fyrir þetta unga fólk sem líður þannig að það vilji ekki fara í skólann, það skynjar ofbeldi. Við þurfum bara að gera betur, það er það sem við þurfum að gera,“ segir hann.

Meiri mannafli í skólum borgarinnar

Menntayfirvöld í borginni hafi verið meðvituð um stöðu mála en ekki gripið nógu hratt inn í, né tekið nógu fast á, að hans mati. Steinn tekur fram að vinna hafi farið fram innan skóla- og frístundasviðs en að sökum þess að málið snertir börn hafi ekki verið unnt að greina frá því. Ekki sé svo að skólayfirvöld borgarinnar hafi setið auðum höndum. Þó hafi sýnt sig að ekki nóg var gert né nógu hratt.

„Við þurfum kannski meiri mannafla inn í skólana þegar svona aðstæður koma upp. Við þurfum líka einfaldlega að styðja betur við kennarana okkar og skólastarfið,“ segir Steinn.

Til hvaða úrræða ertu þá að vísa?

„Við getum sett aðstoð inn í bekkina. Við getum fjölgað kennurum. Við getum sent stuðningsfulltrúa og atferlisfræðinga. Ég veit að landsteymið hefur komið að málum þarna í skólanum sem er á vegum Miðstöðvar menntunar og skólaþjónustu. Við höfum ýmis úrræði og við þurfum einfaldlega að auka þau til þess að þetta endurtaki sig ekki,“ segir Steinn.

Hann segir að almennt sé brugðist við slíkum málum með því að vinna þétt með skólayfirvöldum og foreldrum á hverjum stað fyrir sig en að erfitt sé að tjá sig um þetta tiltekna mál af tilliti til þeirra barna sem eiga í hlut og aðstandenda þeirra.

Lærdómur í öllum málum

Það sé þó ljóst að nauðsynlegt sé að efla íslenskukennslu.

„Við þurfum líka að auka íslenskukennsluna, það er að segja íslenska sem annað tungumál þannig að allir sem koma hingað séu fullfærir um að bjarga sér á íslensku. Ég gleðst yfir því að þetta er eitt af forgangsverkefnum mennta- og barnamálaráðherra að styðja betur við íslenskukennslu,“ segir hann.

Aðspurður gat hann ekki tjáð sig um hvernig best væri að fara að því en ítrekaði mikilvægi fljóts inngrips og viðbragða.

„Öll mál eru lærdómskúrva fyrir okkur. Við lærum eitthvað nýtt í hverju einasta máli sem kemur upp og sjáum hvað við þurfum að gera betur. Þarna er staðan sú að við ætlum að gera betur og við erum að vinna að aðgerðum til að bregðast við þessu.“

„Vonandi getum við komið þessu í þann farveg að börnunum líði vel í skólanum og að foreldrunum vel að vita af börnunum í skólanum. Sem og að búa starfsfólki gott og öruggt starfsumhverfi svo að því líði vel,“ segir Steinn Jóhannsson sviðsstjóri skóla- og frístundasviðs Reykjavíkurborgar.