Gervi­greindin sögð „bjarg­vættur“ jarðgassiðnaðarins

Vexti gervigreindartækninnar er lýst sem bjargvætti jarðgasiðnaðarins í Bandaríkjunum í umfjöllun loftslagsfréttabréfsins Heated. Orkuþörf iðnaðarins knýi nú áfram hraða uppbyggingu gasleiðslna og orkuvera þar sem endurnýjanlegir orkugjafar nái ekki að seðja hana nógu hratt.

Jarðefnaeldsneytisrisar eins og Exxon og Chevron hyggi nú á framkvæmdir við gasorkuver sem eiga sérstaklega að þjónustu gagnaver. Gasleiðslufyrirtæki hafi ekki undan að svara fyrirspurnum frá gagnaverum um tengingar við gasorkuver.

Samfélagsmiðlarisinn Meta, sem á meðal annars Facebook og Instagram, ætlar að knýja nýtt gagnaver sitt í Lúisíana með þremur gasorkuverum sem eiga að framleiða 2,23 megavött.

Losun gæti aukist um hátt í heilt álver á dag

Greiningarfyrirtækið S&P Global Ratings áætlar nú að gagnaver eigi eftir að auka eftirspurn eftir jarðgasi um 85 til 170 milljónir rúmmetra á dag fyrir árið 2030. Það er sagt sambærilegt við alla jarðgasnotkun Flórídaríkis. 

Bruni á því gasi gæti bætt 164 til 329 þúsund tonnum af gróðurhúsalofttegundum út í lofthjúp jarðar á hverjum degi. Til samanburðar losaði álver Elkem á Grundartanga um 357 þúsund tonn af koltvísýringsígildum allt árið 2020.

Í Virginíuríki einu saman, þar sem flest gagnaver Bandaríkjanna er að finna, gera yfirvöld ráð fyrir að vaxandi eftirspurn vegna framþróunar gervigreindar gæti kallað á nýtt 1,5 gígavatta gasorkuver á tveggja ára fresti næstu fimmtán árin.

Vöxturinn ekki endalaus

Þessi stóraukning í bruna á jarðgasi til raforkuframleiðslu er sögð ganga að markmiðum um kolefnishlutleysi fyrir miðja öldina dauðum. Sameinuðu þjóðirnar hafa bent á að draga þurfi úr losun frá gasorkuverum um 28 til 78 prósent til þess að forðast verstu afleiðingar hnattrænnar hlýnunar.

Aðrir benda þó á að takmörk séu fyrir því hversu mikið eftirspurnin geti aukist vegna gervigreindar. Veldisvexti hennar hljóti að ljúka á endanum.

Jerry Wang, lektor í byggingar- og umhverfisverkfræði við Carnegie Mellon-háskólann í Pennsylvaníu, segir að héldi vöxtur gervigreindarlíkana áfram í takt við yfirlýsingar forstjóra tæknifyrirtækja verði orkuþörf þeirra á við alla heimsbyggðina.

„Það er klárlega ekki að fara gerast,“ segir hann.