Skipta út stjórnar­for­manni sem sendi Ep­stein pyntinga­mynd­band

Nafn Sultans Ahmed bin Sulayem kemur ítrekað fyrir í skjölum sem bandaríska dómsmálaráðuneytið birti úr rannsóknum sínum á Jeffrey Epstein, barnaníðingi og auðkýfingi. Bin Sulayem er áhrifamikill í Sameinuðu arabísku furstadæmunum og var hann stjórnarformaður og forstjóri DP World, eins stærsta flutningsfyrirtækis heims.

DP World tilkynnti í dag að Essa Kazim tæki við stjórnarformennskunni og að Yuvraj Narayan yrði forstjóri. Bin Sulayem var ekki nefndur sérstaklega á nafn í tilkynningunni, að sögn AP-fréttastofunnar.

Breytingarnar eiga sér stað daginn eftir að kanadískir og breskir fjárfestingasjóðir sögðust ætla að stöðva frekari viðskipti við DP World vegna uppljóstrana um tengsl Bin Sulayem við Epstein.

Í tölvupóstum sem gengu á milli Bin Sulayem og Epstein ræddu þeir meðal annars um klæm, kynferðislegt nudd og fylgdarkonur. Þá er Bin Sulayem sagður hafa sent Epstein myndbönd af pyntingum.

„Þakka þér vinur minn ég er á leið að prófa nýjan 100% kvenkyns Rússa á snekkjunni minni!“ skrifaði Bin Sulayem til Epstein eftir að Bandaríkjamaðurinn hafði lýst honum sem sínum traustasta vini árið 2013.

Þá virðist Bin Sulayem hafa sent Epstein myndband af pyntingum árið 2009. Í það minnsta sagði Epstein honum í tölvupósti að hann hefði „elskað pyntingamyndbandið“.