Stefnu Sam­skipa gegn Eimskipum vísað frá dómi

Eimskip segir í tilkynningu sem fyrirtækið sendi frá sér áðan að málinu hefði verið vísað frá héraðsdómi í dag. Uppkvaðning úrskurðar í málinu var á dagskrá Héraðsdóms Reykjavíkur klukkan ellefu.

Samskip stefndu Eimskipum og Vilhelm Má Þorsteinssyni, forstjóra Eimskipa, og krafðist þess að bótaskylda síðarnefnda skipafélagsins yrði viðurkennd vegna meintra ólögmætra og saknæmra athafna í tengslum við sátt Eimskipa við Samkeppniseftirlitið árið 2021. 

Ekki var kveðið á um fjárhæðina en lögmaður Samskipa sagði í apríl að tjónið gætið hlaupið á milljörðum króna.

Málið má rekja til þess að Eimskip féllst á að greiða einn og hálfan milljarð króna í sekt vegna ólögmæts samráðs við Samskip samkvæmt sáttinni. Samskip gerði ekki sátt í málinu og var sektað um 4,2 milljarða króna í fyrra.

Í stefnunni var vísað til yfirlýsinga í sátt Eimskipa og Samkeppniseftirlitsins um samráðið og tjóns sem Samskip hefðu orðið fyrir vegna þess að Eimskip skuldbundu sig til þess að hætta viðskiptalegu samstarfi við samkeppnisaðilann.

Hæstiréttur samþykkti í dag að veita Samskipum leyfi til að áfrýja máli þeirra gegn Samkeppniseftirlitinu. Landsréttur hafði komist að þeirri niðurstöðu að Samskip gætu ekki skotið sátt Eimskipa til áfrýjunarnefndar samkeppnismála.