Segir Biden „hella olíu á eldinn“

Yfirvöld í Bandaríkjunum hafa ekki staðfest formlega að leyfi þetta hafi verið veitt en fjölmiðlar vestanhafs hafa sagt frá því. Dmitrí Peskóv, áðurnefndur talsmaður, sagði að með þessu væru Bandaríkin að taka beinan þátt í stríðinu. Það væri hættulegt og mikil „ögrun“.

ATACMS-eldflaugar drífa allt að þrjú hundruð kílómetra en hægt er að skjóta þeim með HIMARS-vopnakerfum sem Bandaríkjamenn hafa fengið frá Bandaríkjamönnum og Bretum.

Ríkisstjórn Bidens er einnig sögð vinna af því að koma umfangsmiklu magni hergagna sem þingið hefur veitt heimild fyrir að senda til Úkraínu til landsins eins fljótt og auðið er, af ótta við að þegar Donald Trump tekur við völdum í janúar, muni hann stöðva alla aðstoð handa Úkraínu.

Óljóst er hve margar slíkar eldflaugar Úkraínumenn eiga þessa stundina og hvort von sé á fleiri eldflaugum frá Bandaríkjunum. Framleiðsla þeirra er ekki mjög umfangsmikil og talið er að Bandaríkjamenn eigi ekki gífurlega margar í vopnabúrum sínum.

Einnig er óljóst hvort einhverjar takmarkanir fylgi leyfi Bandaríkjamanna. Það er að segja að mögulegt er að Úkraínumenn megi bara gera árásir á tiltekin skotmörk eða á tilteknum svæðum í Rússlandi.

Hér að neðan má finna tól sem gert var af starfsmönnum bandarísku hugveitunnar Institute for the study of war, þar sem búið er að kortleggja ýmis skotmörk fyrir Úkraínumenn sem eru í færi fyrir ATACMS. Þar á meðal eru flugstöðvar, vopnageymslur og þjálfunarstöðvar.

Takmarkaður fjöldi eldflauga eru hluti af því að Úkraínumenn hafa einnig reynt að fá svokallaðar Taurus-eldflaugar frá Þýskalandi. Það hefur þó engan árangur borið. Fjölmiðlar í Þýskalandi segja Olaf Scholz ekki ætla að senda Úkraínumönnum að Taurus-eldflaugar.

Bild segir umræðu um afhendingu Taurus eiga sér stað í Þýskalandi, aftur. Kristilegir Demókratar, Frjálslyndir Demókratar og Græningjar séu hlynntir því að senda Úkraínumönnum eldflaugar. Scholz og Jafnaðarmenn séu það ekki.

Sjá einnig: Scholz ver sím­tal sitt við Pútín

Taurus drífa allt að fimm hundruð kílómetra og fljúga í einungis 35 metra hæð, sem gerir loftvarnarkerfum mjög erfitt að finna þær og skjóta þær niður, samkvæmt DW. Miðillinn sagði í mars að Þjóðverjar ættu um sex hundruð stýriflaugar og að allt að þrjú hundruð gætu verið sendar til Úkraínu með litlum fyrirvara.

Fjölmiðlar í Þýskalandi segja einnig að Þjóðverjar séu að senda um fjögur þúsund nýja dróna til Úkraínu. Drónar þessari eru kallaðir mini-Taurus og eru sagðir geta komist hjá rafrænum vörnum Rússa og GPS-truflunum þar sem þeim sé stýrt að hluta til af gervigreind. Drónarir er einnig sagðir langdrægir.

Þöglir Bretar

Yfirvöld í Bretlandi hafa ekki viljað segja til um það í morgun hvort Úkraínumönnum verði leyft að nota breskar eldflaugar til árása í Rússlandi. Sky News hefur eftir talsmanni ríkisstjórnarinnar að stefnan þar á bæ hafi yfirleitt verið að segja ekki frá slíkum hlutum, því það þjónaði engum nema Pútín í ólöglegri innrás hans.

Talsmaðurinn sagði þó að Bretar væru yfirleitt samstíga bandamönnum sínum í því að tryggja að Úkraínumenn hefðu þann stuðning sem þeir þyrftu.

Svipaða sögu er að segja frá Frakklandi en Frakkar og Bretar þróuðu saman stýriflaugar sem kallast SCALP/Storm Shadow og hafa Úkraínumenn fengið margar slíkar á undanförnum árum, meðal annars á Krímskaga, sem Rússar segja tilheyra Rússlandi eftir ólöglega innlimun árið 2014.

Rússar skutu skotflaugum að Odessa í morgun, eftir umfangsmiklar dróna- og eldflaugaárásir síðustu daga. Ein flauganna er sögð hafa lent á íbúðarsvæði og eru minnst tíu látnir og um fjörtíu særðir. Úkraínumenn hafa lengi sagt leyfi til árása í Rússlandi með langdrægum vopnum frá Vesturlöndum geta gert Rússum erfiðara að gera slíkar árásir.

Bretar vilja ekkert segja

Eins með ATACMS, er óljóst hve margar SCALP/Storm Shadow eldflaugar eru í boði fyrir Úkraínumenn. Hergagnaframleiðsla í Úkraínu hefur aukist til muna frá því innrás Rússa hófst og framleiða þeir til að mynda langdræga dróna sem hafa verið notaðir til árása í Rússlandi á undanförnum mánuðum.

Mikil áhersla hefur að undanförnu verið lögð á það að auka getu Úkraínumanna til að framleiða eigin eldflaugar, að miklu leyti með styrkjum frá bakhjörlum Úkraínu.

Þannig vilja Úkraínumenn framleiða eigin stýrflaugar og langdræga sjálfsprengidróna til að nota til árása á hernaðarleg skotmörk og innviði í Rússlandi, sem styrkt gæti stöðu Úkraínumanna frekar komi til friðarviðræðna.

Fá sjálfir mikið magn vopna frá öðrum

Í nánast hvert sinn sem bakhjarlar Úkraínu hafa veitt Úkraínumönnum aðgang að nýjum vopnum og hergögnum hafa Rússar hótað einhverskonar stigmögnun eða jafnvel kjarnorkuárásum. Þetta átti við þegar Úkraínumenn fengu vestræna skriðdreka, HIMARS-eldflaugakerfi, F-16 herþotur og svo mætti lengi telja.

Vladimír Pútín, forseti Rússlands, hefur áður sagt að leyfi bakhjarlar Úkraínumanna þeim að nota vestræn vopn til árása í Rússlandi, gætu Rússar veitt öðrum andstæðingum Vesturlanda þeirra að rússneskum vopnum.

Líkur hafa verið leiddar að því að þar hafi hann verið að tala um Íran eða mögulega Húta í Jemen. Fregnir hafa borist af því að Hútar hafi, með milligöngu Írana, reynt að fá háþróaðar stýriflaugar, sem hannaðar eru til að sökkva skipum, frá Rússum.

Sjá einnig: Hútar vilja háþróaðar stýriflaugar frá Rússum

Rússar hafa fengið mikið magn skotfæra fyrir stórskotalið frá bæði Íran og Norður-Kóreu. Þeir hafa einnig fengið eldflaugar frá Íran og mikið magn sjálfsprengidróna, en bæði eldflaugarnar og drónarnir hafa verið notaðir til árása í Úkraínu. Sömuleiðis hafa á undanförnum dögum borist fregnir af sendingum stórskotaliðsvopna frá Norður-Kóreu til Rússlands.

Myndefni sem birt hefur verið á samfélagsmiðlum í Rússlandi hefur sýnt að Rússar hafa fengið bæði fallbyssur og eldflaugaskotpalla (MLRS) frá Norður-Kóreu.

Ríkismiðlar Norður-Kóreu birtu nýverið myndir af Kim Jong Un, einræðisherra ríkisins, að skoða nýja sjálfsprengidróna sem svipa mjög til sambærilegra dróna frá Rússlandi og Íran.

Hafa ekki áhuga á tillögum Erdogans

Peskóv ítrekaði einnig í morgun að Rússar hefðu ekki áhuga á að frysta átökin í Úkraínu og Rússlandi. Talið er að Recep Tayyip Erdogan, forseti Tyrklands, muni leggja slíka tillögu fram á fundi G20 ríkjanna sem hefst í Brasilíu í dag. Sergei Lavrov, utanríkisráðherra Rússlands, sækir fundinn.

Samkvæmt heimildum Bloomberg (áskriftarvefur) felur tillaga Erdogans meðal annars í sér að stofna hlutlaust svæði í austurhluta Úkraínu og að alþjóðlegt herlið vakti það. Þá verði viðræðum um mögulega inngöngu Úkraínu í Atlantshafsbandalagið frestað í tíu ár og í staðinn fái Úkraína áframhaldandi hernaðaraðstoð.

RIA fréttaveitan, sem er í eigu rússneska ríkisins, hefur eftir Peskóv að Rússar hafi áður gert ljóst að það að frysta átökin komi ekki til greina. Til að stöðva átökin þurfi Úkraínumenn og Vesturlönd að verða við kröfum Rússa.