Þrátt fyrir mikið tap er for­stjóri Play bjart­sýnn

Play birti ársreikning sinn fyrir síðasta ár á fimmtudag og síðan þá hafa verið miklar sögusagnir um bága stöðu félagsins. Eigið fé væri lítið og félagið væri jafnvel að reka sig á fyrirfram greiddum farmiðum farþega og ferðaskrifstofa.

Á fyrstu þremur rekstrarárum félagins hefur það tapað 17 milljörðum króna, sem er helmingi meira tap en WOW tapaði eftir sex ára rekstur. Eftir kynningu á ársuppgjöri féll gengi félagsins um 19 prósent á föstudag. 

Birgir Jónsson forstjóri Play segir stöðu félagsins hins vegar góða og stjórnendur horfi björtum augum til framtíðar.

„Hins vegar hefur komið fram og stjórn félagsins hefur lagt áherslu á að setja í gang ferli til að safna nýju hlutafé inn í félagið. Sem er í raun og veru ekki stór fjárhæð í stóru myndinni. Það er til að fjármagna frekari vöxt og styrkja félagið til framtíðar. Við erum að hefja þá vegferð. Það snýst ekki um neina tímasetningu, daga eða vikur. Þetta þarf að gerast á næstu tólf mánuðum,“ segir Birgir. Flugrekstur væri erfiður og eldsumbrot og verkföll flugumferðarstjóra hefðu reynt á flugfélög.

Á þeim tíma sem WOW varð gjaldþrota skuldaði það stórar fjárhæðir meðal annars lendingargjöld og önnur gjöld hjá Ísavía til margra mánaða. Munurinn á WOW og Play er meðal annars sá að WOW var í einkaeigu en Play er skráð á markað með um tvö þúsund hluthafa.

„Við erum skráð fyrirtæki og opnum okkar bækur fjórum sinnum á ári. Það getur hver sem vill séð að það eru engar vaxtaberandi skuldir í félaginu. Það eru engin vanskil og það er engin röð af einhverjum kröfuhöfum hérna út um dyrnar. Þessi rekstur er í jafnvægi. Við erum nýtt fyrirtæki. Við erum í tapi en það helmingaðist á síðasta ári og við erum mjög bjartsýn á framtíðina,“ segir forstjóri Play.

Um miðjan dag í dag tilkynnti Landsbankinn Kauphöllinni uppsögn bankans á viðskiptavakt með bréf í Play frá og með næsta föstudegi, sem meðal annars fól í sér skuldbindingu um kaup á bréfum í félaginu. Upplýsingafulltrúi Play segir Arion banka hins vegar halda sinni viðskiptavakt áfram. Fyrirtækið kanni nú áhuga tíu stærstu hluthafa á að leggja félaginu til aukið hlutafé upp á þrjá til fjóra milljarða króna. Niðurstaðan ætti að liggja fyrir á allra næstu vikum.

Forstjórinn segir félagið hafa velt 40 milljörðum í fyrra og tap þess væri lítið í því ljósi. Fréttastofu er kunnugt um að yfirvöld, þar með talin Samgöngustofa, fylgist vel með rekstri fyrirtækisins.

„Við erum sem skráð félag í stanslausu sambandi við Samgöngustofu, fjármálaeftirlit og aðra eftirlitsaðila. Okkar leigusala, kreditkortafyrirtæki og aðra sem hafa aðgengi að öllu. Þannig að nei, ég get ekki sagt að þeir sem raunverulega skilja stöðuna og þekkja hana hafi áhyggjur af henni,“ segir Birgir Jónsson.