Palestínu­menn reistu snjóskýli á Austur­velli

Hópur Palestínumanna sem bíða fjölskyldusameiningar auk stuðningsfólks þeirra, hefur hafst við á Austurvelli í 35 daga. Tjaldbúðir voru reistar milli jóla og nýárs á Austurvelli fyrir framan Alþingishúsið með leyfi frá Reykjavíkurborg. 

Þann 18. janúar var veitt heimild til upp­setn­ing­ar á einu sam­komutjaldi þar sem ekki var leyfilegt að gista. Það leyfi rann út þann 24. janúar og síðstu umsókn um framlengingu var hafnað. Fólkið hefur því undanfarna daga dvalið undir berum himni.

Reistu snjóskýli til að verjast vindi og úrkomu

Í gærkvöldi reistu mótmælendur skýli úr snjó fyrir framan Alþingishúsið, þar sem það hefst nú við í skjóli frá mesta vindinum og úrkomu. 

Samkvæmt því sem fréttastofa kemst næst er ekki nein reglugerð til staðar sem nær yfir snjóhús eða virki né dvöl í þeim. 

Mót­mæl­end­ur krefja stjórn­völd um þrennt: Að stjórn­völd standi við fjöl­skyldu­sam­ein­ing­ar sem þeir hafa fengið samþykktar, að palestínskt flótta­fólk hér á landi fái hæli og að ráðherr­ar ríkistjórnarinnar verði við ósk þeirra um fund.

Í viðtölum við fréttastofu hafa mótmælendur sagst aldrei munu gefast upp og dvelja á götunni eins lengi og þarf til að kröfur þeirra verði uppfylltar.