Gjafakort virki svo sannar­lega á útsölum

„Það er bara vitleysa. Ég fór rangt með þar. Almenna reglan er að gjafakort virka á útsölum líka,“ segir Andrés Magnússon, framkvæmdastjóri Samtaka verslunar og þjónustu í samtali við Vísi.

Andrés sagði á Bítinu í Bylgjunni í morgun að ekki væri hægt að nota gjafakortin á útsölum. Ástæðan væri sú að vörur á útsölu væru á öðru verði og í tilfelli gjafakorta væri miðað við reglulegt verð vörunnar.

Svona hafi þetta verið áður fyrr

Andrés segir misskilning sinn fólginn í því að markaður gjafakorta hafi verið allt öðruvísi áður fyrr. Í dag séu þau öll meira og minna rafræn og segir Andrés þetta gott dæmi um hvernig þróunin hafi komið neytendum til góða.

„Misskilningurinn er þar og án þess að vera nokkuð að fara nánar út í það þá var þetta svona áður. Nú eru öll þessi gjafakort orðin rafræn og þá hefur þetta gjörbreyst. Það er hægt að fullyrða það að þetta var ósköp einfaldlega rangt hjá mér og að núna er almenna reglan sú, til dæmis í Smáralind og Kringlunni, að gjafakort þau gilda á útsölum líka.“

Svipuð jólaverslun í ár

Þá ræddi Andrés ýmislegt annað í Bítinu í morgun. Hann sagði að gera megi ráð fyrir því að jólaveltan hafi verið svipuð nú og í fyrra ef horft sé til fjöldans sem heimsótti Kringluna og Smáralind og almenna tilfinningu verslunarmanna.

Hann sagði þá að kauphegðun landsmanna hefði breyst mikið á undanförnum árum. Nú færi jólainnkaupin í mun meira mæli fram á sérstökum tilboðsdögum í byrjun nóvember líkt og á Svörtum föstudegi og Stafrænum mánudegi.