Reyndi að kveikja í æsku­heimili Martin Luther King

King átti heima í húsinu fyrstu tólf ár lífs síns og er húsið friðað. Alla jafna er húsið opið fyrir vegfarendur að skoða en vegna framkvæmda hefur því verið haldið lokað síðustu mánuði. 

BBC segir að á myndbandi megi sjá konu í svörtum fötum hella eldsneytinu á veröndina og glugga heimilisins. Lögreglu var tilkynnt um konuna en þegar hún kom á staðinn voru fjórir vegfarendur búnir að stöðva konuna. 

Þeir höfðu séð hana vera að hella eldsneytinu, kasta eldsneytisbrúsanum frá sér og taka upp kveikjara sem lá á grasinu við hliðina á henni. 

Konan, sem er 26 ára gömul, var handtekin og gekkst undir geðmat. Hún gisti í fangaklefa í nótt og gæti verið ákærð fyrir athæfi sitt.