Ekki víst að allir haldi vinnunni hjá Brim

Framkvæmdastjóri Brims, Ægir Páll Friðbertsson, segir að líklegi verði ekki hægt að finna starf fyrir alla þá 31 starfsmenn fiskvinnslunnar Kambs sem var sagt upp í gær. Uppsögnina má rekja til sameiningar fiskvinnslunnar Kambs í Hafnarfirði við fiskvinnslu Brims í Grandagarði í Reykjavík en Brim keypti Kamb árið 2019. Alls eru um 700 stöðugildi í heildina á ári hjá fyrirtækinu.

Brim keypti botnfiskvinnslu Kambs í Hafnarfirði árið 2019 en hún sameinast nú vinnslu þeirra í Reykjavík. Með sameiningunni missir 31 starfsmaður Kambs vinnuna en fram kemur í tilkynningu að leitast verði eftir því að finna þeim starf í Reykjavík eða á öðrum starfsstöðvum Brims. Ægir Páll  segir helstu ástæðu sameiningarinnar vera skertar aflaheimildir á þorski, samkeppnisstaða við erlendar fiskvinnslur og verðhækkanir.

„Okkar hugmynd er að hagræða og sameina í Reykjavík.“

Verða ekki fyrir tekjumissi haldi þau vinnunni

Flestir sem var sagt upp voru í fullri vinnu og verði þeim fundið sambærilegt starf gerir Ægir ráð fyrir því að þau verði ekki fyrir neinum tekjumissi.

„Við munum leitast við að bjóða þeim sambærileg störf hjá Brim,“ segir Ægir og að hann eigi til að það verði til viðbótarstörf í vinnslunni í Reykjavík.

„Við gefum okkur þrjá mánuði í þetta, til lok október, að vinna úr þessum málum. Þetta eru alltaf erfiðar ákvarðanir, að loka vinnustað. Það var það í þessu tilfelli líka, eins og alltaf.“

Hann á þó ekki von á því að allir fái vinnu.

„Þetta er hagræðingaraðgerði og á ekki á von á öðru en við getum auðvitað aldrei lofað öllum vinnu, en stórum hluta,“ segir Ægir að lokum.

Gæta að réttindum fólks

Starfsfólkið sem missti vinnuna er nærri allt í verkalýðsfélaginu Hlíf í Hafnarfirði. Formaður félagsins Eyþór Þ. Árnason segir uppsögnina högg en að fólk hafi tekið þessu ágætlega. Hann segir að forsvarsmenn Kambs hafi haft samband við hann fyrir rúmri viku og farið yfir stöðuna. Hann segir uppsögnina samkvæmt bókinni en að félagið muni fylgja málinu eftir og tryggja að gætt verði að réttindum fólks.

„Flestir eru með tveggja eða þriggja mánaða uppsagnarfrest. Þeim er allflestum boðin vinna og beðin um að fylla út eyðublað um áhuga um að starfa áfram hjá Brim,“ segir Eyþór og að hann eigi von á því að fólk haldi sínum launakjörum og réttindum. Auk þess hafi samgöngustyrk bætt við fyrir þau sem búa til dæmis í Hafnarfirði.

„Ég er alls ekki viss um að allir muni halda vinnunni en það er vinna í boði inn í Norðurgarði fyrir rúmlega helming, en ég segi það án ábyrgðar,“ segir Eyþór sem var viðstaddur uppsögnina og talaði við fólk eftir að þeim hafði verið tilkynnt um hana.

Hann segir þetta þriðju fiskvinnsluna sem lokar á þessu ári í Hafnarfirði og hefur áhyggjur af stöðunni.

„Það er búið að loka smærri fiskvinnslum hér í Hafnarfirði. Þá er ég að tala um með fimm til tíu starfsmenn, ekkert eins og hjá Kambi þar sem er 31 starfsgildi sem er verið að leggja niður. Ég veit til þess að tvær eða þrjár hafi hætt og það er dálítið þungt hljóðið í þeim sem eru með fiskvinnslu hér í Hafnarfirði,“ segir Eyþór og að þar hafi hátt verð á hráefni haft mikil áhrif.

Hann segist sjá eftir vinnslunni í Hafnarfirði og að þetta sé stærsta höggið af þeim sem hafi verið að loka eða fækka starfsfólki.

„Á fundinum í gær fannst mér andrúmsloftið ekki þungt eða þrúgað. Mér fannst eins og þetta kæmi þeim ekki á óvart. Þetta er alltaf leiðinlegt en það var ekki þungt yfir,“ segir Eyþór og að eflaust hafi það áhrif að atvinnuhorfur í samfélaginu séu ágætar og að fólki hafi verið boðið að sækja um hjá Brim í Reykjavík.

Hann segir félagið fylgja málinu eftir. Vinnslan loki í lok október og að þangað til fylgist félagið vel með.