Opna menningar­miðstöð í Smára­lind

Í tilkynningu frá Kópavogsbæ segir að verkefnið sé þróað af Kópavogsbæ í samstarfi við Heima og að um sé að ræða framsýna hugsun á sviði menningarmála þar sem fléttast saman nútímabókasafn í bland við menningarupplifun og fjölbreytta þjónustu.

Þá segir að verkefnið sé jafnframt hluti af stærri þróun menningarinnviða hjá Kópavogsbæ sem samþykkt hafi verið í bæjarstjórn í gær þar sem áætlað sé að tveir nýir menningarkjarnar rísi. Annars vegar í Kórnum og hins vegar í Smáralind.

Haft er eftir Ásdísi Kristjánsdóttur bæjarstjóra að Kópavogsbær sé öflugur menningarbær og státi þegar af einu besta bókasafni landsins í Hamraborg.

„Menningarmiðstöðin mun efla starfsemi þess enn frekar og auka um leið aðgengi að menningunni í Kópavogi. Menningarmiðstöð í Smáralind og nýtt bókasafn í efri byggðum þýðir líka bætt aðgengi íbúa að bókum, sem er gríðarlega mikilvægt á tímum þar sem dregið hefur úr lestri barna og ungmenna. Þá hefur uppbygging íbúða og þjónustu í Smárahverfi undanfarin ár stutt við svæðið sem annan af tveimur miðpunktum bæjarins og mikilvægt að menningin eigi þar samastað. Á þessu kjörtímabili höfum við lagt ríka áherslu á að efla enn frekar menninguna í Kópavogi og ég er afar stolt af þeim breytingum sem við höfum ráðist í með endurnýjun á aðalsafni og Náttúrusafni Kópavogs. Ég er sannfærð um að íbúar Kópavogs munu taka menningarmiðstöðinni fagnandi, rétt eins og þeim breytingum sem við höfum þegar ráðist í, “ segir Ásdís Kristjánsdóttir bæjarstjóri Kópavogs.

Í tilkynningunni segir skrifstofa umbóta og þróunar hafi leitt undirbúning verkefnisins og segi Védís Hervör Árnadóttir, umbóta- og þróunarstjóri þetta eitt mesta framfaraskref í uppbyggingu menningarinnviða í langan tíma, eða frá því að menningarkjarninn við Hamraborg reis þar sem nú standi Salurinn, Gerðarsafn, Bókasafn Kópavogs og Náttúrusafn Kópavogsbæjar.

„Bókasöfn gegna nýju hlutverki í breyttum heimi, eru heimili að heiman, vettvangur viðburða og afdrep í erli samtímans. Menningarmiðstöð í Smáralind er því frábær viðbót við þá þjónustu og menningarframboð í Kópavogsbæ. Við sjáum fjölmörg spennandi tækifæri í nýju rými þar sem við ætlum að sameina nútímabókasafn, menningu, upplifun, starf og leik. Við munum nýta okkar þekkingu en jafnframt horfa til þess er best gerist í nágrannalöndunum í söfnum á borð við Oodi í Helsinki og Deichman í Osló,“ er haft eftir Védís Hervör Árnadóttir.„Öflugt starfsfólk menningarmála í Kópavogi hefur undirbúið verkefnið af fagmennsku og með hag íbúa að leiðarljósi. Við erum spennt fyrir samstarfinu við Heima og hlökkum til að klippa á borðann í nýrri menningarmiðstöð.“