Veðurstofa Íslands hefur uppfært hættumatskortið fyrir gosstöðvarnar við Litla-Hrút. Hættusvæðið þar sem ný gosop geta myndast hefur nú verið stækkað í suðvestur.
Þetta kemur fram í tilkynningu frá Veðurstofunni. Þar segir að skjálftagögn hafi verið yfirfarin og ný líkön hafi verið keyrð til að áætla betur legu kvikugangsins sem myndaðist í aðdraganda gossins. Í kjölfarið hafi síðan verið ákveðið að stækka hættusvæðið þar sem ný gosop geta myndast.
Kvikugangurinn nær nú frá Keili í norðri undir merahnjúkaleiðina í suðri.
Almannavarnir biðla til fólks að ganga ekki að Litla-Hrúti frá Vigdísarvallavegi sem var opnaður í morgun. Þó það sé styttra að eldgosinu í beinni loftlínu þá er engin stikuð gönguleið þaðan og leiðin því bæði erfiðari og hættulegri.
Opnað hefur verið fyrir aðgang að gossvæðinu við Litla-Hrút að nýju. Lokað var fyrir aðgang klukkan fimm í gær vegna lélegs skyggnis á svæðinu.
Lítið virðist vanta upp á að hraun frá gosstöðvunum við Litla-Hrút geti farið að renna yfir vatnaskil til norðurs í átt að Faxaflóa og Reykjanesbraut, miðað við myndir sem teknar voru í gær af eldgígnum og hrauntjörninni norðan hans.
