Tveir í haldi grunaðir um mann­­dráp í Hafnar­­firði

Þetta staðfestir Grímur Grímsson, yfirlögregluþjónn hjá lögreglunni á höfðuborgarsvæðinu, í samtali við fréttastofu. 

Hann segir lögreglu hafa komið að vettvanginum, sem enn sé innsiglaður, á sjötta tímanum í morgun. Þar hafi maður fundist látinn utandyra. Tveir menn hafi verið handteknir á vettvangi. Annar utandyra en hinn inni í nálægu húsi.

Að öðru leyti sagðist Grímur ekki geta tjáð sig og vísaði til þess að von væri á yfirlýsingu frá lögreglunni innan skamms. 

Endurlífgunartilraunir báru ekki árangur

Í tilkynningu lögreglunnar kemur fram að maðurinn, sem var á fimmtugsaldri, hafi látist í iðnaðarhverfi í Hafnarfirði í nótt. Lögreglu hafi borist tilynning um málið á sjötta tímanum og haldið þegar á vettvang. 

„Hinn látni var meðvitundarlaus utandyra þegar að var komið. Reynt var að endurlífga manninn en það bar ekki árangur. Í kjölfarið voru tveir karlar handteknir í tengslum við málið, annar í húsi við vettvanginn og hinn þar nærri. Rannsókn málsins er á frumstigi og ekki er hægt veitta frekar upplýsingar að svo stöddu,“ segir í tilkynningunni.

Þar segir einnig að lögregla muni senda frá sér frekari upplýsingar eftir því sem rannsókn málsins vindur fram.

Fréttin hefur verið uppfærð.