Ekki hlust­að á starfs­fólk sem vill hald­a sínu vinn­u­rým­i

Háskóli Íslands stendur fyrir framkvæmdum á Hótel Sögu um þessar mundir en þar eiga að rísa stúdentaíbúðir auk þess sem unnið er að flutningi á starfsemi menntavísindasviðs, sem áður var til húsa í Stakkahlíð meðal annars.

Með flutningunum mun starfsfólk færast yfir í svokallað verkefnamiðað vinnuumhverfi, sem gengur einna út á það að fólk sé ekki með fasta vinnuaðstöðu heldur færi sig á milli staða eftir því hvað þau eru að gera að hverju sinni. Vanalegast er um mjög opin rými að ræða.

„Ég heyri ekki annað en það sé bara mjög mikil óánægja, að það lítist eiginlega engum á þetta af akademíska starfsfólkinu alla vega. Það er svo mikilvægt að geta einbeitt sér og það er bara ekkert hægt að gera það í hvaða rými sem er,“ segir Eyja Margrét Jóhönnu Brynjarsdóttir, prófessor í heimspeki við HÍ, um málið.

„Fólk sem vinnur við háskólann er yfirleitt með mikið af bókum og alls konar rannsóknargögnum í kringum sig innan seilingar og það er ekki hægt í svona rými. Það á að vera sem minnst af áþreifanlegum gögnum og gert ráð fyrir að það sé allt meira og minna á tölvutæku formi, sem er bara ekki raunin. Fólk heldur kannski að það sé allt komið á netið en það er bara ekki þannig,“ segir hún enn fremur.

Ekki hlustað á gagnrýni starfsfólks

Háskóli Íslands hefur ráðið hollenska ráðgjafafyrirtækið Veldhoen + Company, sem sérhæfir sig í verkefnamiðuðu vinnuumhverfi, til að þróa hugmyndir um vinnurými starfsfólks á Hótel sögu. Í kynningu frá fyrirtækinu má finna nokkur dæmi lögð fram um uppsetningu rýmanna en í flestum tilvikum eru rýmin að mestu opin, með nokkrum afmörkuðum svæðum þar sem fólk getur fengið örlítið næði.

Starfsfólk hafi reynt að koma athugasemdum og áhyggjum sínum á framfæri til fyrirtækisins, án árangurs. „Skilaboðin hafa verið á þann veg að ef starfsfólkið segir að því lítist ekki á þessar hugmyndir þá eru svörin að við kunnum ekki að skipuleggja okkur rétt og þurfum að læra að vinna öðruvísi,“ segir Eyja.

Verkefnamiðuð vinnuumhverfi eru ekki ný af nálinni en þau hafa til að mynda verið rannsökuð erlendis. Með breytingunni muni þeir sem geta fara að vinna heima, sem hafi ekki góð áhrif á starfsandann eða möguleikann til samvinnu.

„Rannsóknir hafa sýnt að afköst minnka, veikindi aukast og starfsánægja minnkar auk þess sem möguleikinn á að einbeita sér, það er mikið kvartað yfir því að hann sé ekki til staðar,“ segir Eyja.

Fyrirhugaðar eru breytingar á rými starfsfólks annarra sviða með tímanum en markmið ríkisstjórnarinnar samkvæmt fjármálaáætlun til næstu fimm ára er að 25 prósent ríkisaðila muni vinna í verkefnamiðuðu umhverfi árið 2024 og 65 prósent árið 2028. Þó umhverfið henti eflaust sumum telja starfsmenn háskólans að taka þurfi tillit til þeirra eðli þeirra starfa, sem hafi ekki verið gert hingað til.

„Auðvitað mætti skoða hvort það eru einhverjar aðrar leiðir en það þarf þá að vera í fullri samvinnu við starfsfólkið, hvað það telur sig geta og hvað það telur að sé mögulegt,“ segir Eyja.