„Þetta er sjúk­dómur sem getur tekið ungt fólk“

Sólarvörn á andlit og háls allt árið

Jenna segir sólarvörn og notkun hennar hér á landi stórkostlega vanmetin og að almennt geri fólk sér ekki grein fyrir mikilvægi daglegrar notkunar.

Sólin blekkir okkur á Íslandi því að lofthitinn er svo lítill, en geislarnir eru svo sterkir.

Þrátt fyrir að ekki fari mikið fyrir sólinni á veturna hér á landi segir Jenna þó ekki síður mikilvægt að nota sólarvörn daglega í andlitið.

„Því þetta er í rauninni húðvörn, ekki bara sólarvörn. Verndar gegn kulda, roki, mengun og öllu sem mæðir á húðinni.“

Fólk sem starfi mikið úti við allan ársins hring, eins og bændur eða hestafólk séu líklegri til að fá æðaslit eða hljóta einhvern húðskaða og þá sjái mun fyrr á húðinni sé hún óvarin.

Viðtalið við Jennu í heild sinni er hægt að nálgast í spilaranum hér fyrir neðan.

Eitt skipti í ljósabekk eykur líkur á húðkrabbameini

Þegar talið berst að ljósabekkjum og hvort að mögulega sé hægt að nota þá hóflega, án þess að það hafi skaðlega áhrif segir Jenna:

Aldrei ljósabekki. Bara að fara einu sinni í ljósabekk eykur líkurnar á sortuæxli um nokkur prósent miðað við þann sem gerir það ekki.

Fyrir þá sem vilji meiri ljóma í húðina og sækist eftir sólarbrúnku séu til mun betri leiðir eins og sjálfsbrúnkuvörur sem mikið úrval sé af í dag.

Sortuæxli er ömurlegur sjúkdómur og maður gerir allt til að komast í veg fyrir hann. Þetta er sjúkdómur sem getur tekið ungt fólk. Það eru ungir einstaklingar sem geta dáið af þessu.

Jenna segir forvarnir vissulega mikilvægar og það vera einstaklingsbundið hversu oft fólk ætti að láta fylgjast með sér og fæðingarblettum. Þau sem eru í áhættuhópum ættu þó öll að vera í reglulegu eftirliti.

„Þetta er fólk sem er með einhverja sögu um sortuæxli, eða fólk sem er með mikið af fæðingarblettum.“

Lasermeðferð vernd gegn húðkrabbameini

Jenna segir mikla sprengingu hafa orðið í kosmetískum húðlækningum síðustu ár og vinsælustu meðferðinar um heim allan botox, eða toxín, meðferðir. Það sé þó mjög margt annað hægt að gera til þess að byggja húðina og halda henni við með öðrum meðferðum. Sjálf segir hún að náttúruleg nálgun sé mjög mikilvæg og að einbeita sér að húðstyrkingu áður en farið er í meðferðir með botox eða fylliefnum.

Ein af þeim meðferðum sem séu að verða vinsælli og vinsælli í dag segir Jenna vera svokallaðar laser húðmeðferðir.

Þetta heitir Fraxel laser og er ný meðferð sem við byrjuðum með í október. Þetta er tækni þar sem laserinn veldur míkró skaða í húðinni sem veldur því að húðin fer í ákveðið viðgerðarferli. Hún fer aftur á fullt að dæla kollageni, elastíni og öllum þessum góðu efnum aftur í húðina.

Meðferðin sé mjög öflug og sem dæmi þurfi eina meðferð af þessari meðferð á móti sirka fjórum af örnálarmeðferðum eins og Dermapen eða öðrum sambærilegum meðferðum.

Er þetta ekkert hættulegt?

„Nei, þetta er ekki hættulegt og það er einmitt ný rannsókn frá Harvard sem kom núna út fyrir jólin sem sýnir að þetta verndar gegn húðkrabbameinum. Því þetta ýtir við viðgerðarferli og húðin fer að bæta sig og snúa til baka.“

Morgunþátturinn Bakaríið er á dagskrá alla laugardaga frá 9 - 12 á Bylgjunni. Hægt er að nálgast síðasta þátt í heild sinni í spilaranum hér fyrir neðan.