Valli flatbaka segir skilið við Flatbökuna

Þetta kemur fram í tilkynningu frá Valgeiri. Í henni kemur fram að nýir eigendur, athafna- og veitingamennirnir Páll Ágúst Aðalheiðarson og Hafþór Rúnar Sigurðsson, muni taka við rekstrinum í lok mánaðarins. Þetta verður ekki þeirra fyrsta ródeó í pizzubakstri þar sem þeir hafa rekið saman matarvagninn PopUp Pizza.

Átta ár eru liðin síðan Valli stofnaði Íslensku flatbökuna. Hann segir að ástæðan fyrir sölunni sé sú að hann er að einbeita sér meira að rekstrinum á öðrum veitingastaði sem er í hans eigu, Indican.

„Flatbakan er barnið mitt sem ég hef nært og gefið alla mína athygli og orku síðastliðin 8 ár. Það hefur gengið vel og ég er virkilega þakklátur fyrir það. En uppá síðkastið hef ég þurft að sinna hinu barninu mínu sem er indican og öll mín orka og athygli fer í það núna ásamt öðrum verkefnum. Mér fannst því vera kominn tími á að rétta flatböku kyndilinn áfram,“ er haft eftir Valla í tilkynningunni.

Hann segir að sér þyki virkilega vænt um Flatbökuna og því hafi það skipt hann miklu máli að reksturinn færi í réttar hendur. 

„Ég er búinn að þekkja Pál í mörg ár, hann vann fyrir mig á flatbökunni á sínum tíma og hefur verið spenntur í langan tíma að koma að rekstri flatbökunnar. Ég er sannfærður að Páll og Hafþór muni koma sterkir inn og halda áfram því góða starfi sem ég og mitt frábæra starfsfólk höfum gert hingað til.“

Valli flatbaka ekki lengur Valli flatbaka

Sem fyrr segir hefur Valli verið kenndur við Flatbökuna undan farin ár. Hann segir að það sé skrýtin tilfinning að kallast ekki lengur Valli flatbaka.

„Ég held ég heiti Valli flatbaka í símaskránni hjá 80% af fólki sem ég þekki. Auðvitað er þetta skrýtin tilfinning. Þetta er nú ekki mikil breyting, Valli flatbaka breytist í Valli indican og í staðinn kemur Palli flatbaka”

Þá kemur fram að Valli sé ekki búinn að leggja pizzuspaðann alveg á hilluna. Hann ætlar nefnilega að standa síðustu vaktina á Flatbökunni sunnudaginn 19. mars.

„Mig langar að kveðja með stæl og ætla að bjóða allar pizzur á 2500kr og láta 500kr af hverri seldri pizzu renna til góðgerðamála.

Að lokum lofar hann að gráta ekki of mikið ofan í pizzur viðskiptavinanna á síðasta deginum sínum.