Tómas og Dendi stefna á að gefa öllum nem­endum í Taksindu flís­peysu

Sjerpinn Dendi hefur aðstoðað hátt í þrjú hundruð íslendinga við fjallmennsku í Nepal og fylgt fjölmörgum upp í grunnbúðir Everest. Haraldur Örn Ólafsson, Vilborg Arna Gissurardóttir og John Snorri Sigurjónsson eru meðal þeirra sem hann hefur aðstoðað.

Dendi og hjartaskurðlæknirinn Tómas Guðbjartsson eru góðir vinir en Tómas er annálaður áhugamaður um fjallaklifur og hefur klifið mörg hæstu fjöll heims.

Í september á síðasta ári voru þeir félagar á ferðalagi í Nepal. „Þar opnaðist landið fyrir mér, ekki bara fjöllin heldur heimsóttum við einnig skóla í Kumbudalnum, spítala og heilsugæslustöðvar,“ segir Tómas.

Í heimabæ Dendi, Taksindu, vatt ferðalagið upp á sig og þeir ákváðu að stofna til söfnunar.

„Það er kalt þarna, þetta er hátt uppi í fjöllunum og í skólunum og á heimilum er mun minna kynt en venjulega þar sem olíuverð hefur rokið upp vegna stríðsins í Úkraínu,“ útskýrði Tómas í samtali við Vísi. 

Þeir Dendi fengu þá hugmynd að safna fyrir flíspeysum handa börnum í þorpinu.

Tómas segir að börnin neyðist til að vera kappklædd í skólanum, séu oft í dúnúlpu innandyra en kvarti þó aldrei.

Afhentu níutíu peysur

Þegar Dendi kom til Íslands í desember settu félagarnir upp fyrirlestra til styrktar verkefninu. Aðgangseyrir var þúsund krónur og rann óskiptur til verkefnisins.

Allur ágóði fór í að kaupa flíspeysur en síðar ákváðu þeir að kaupa líka stílabækur og penna þar sem mikil þörf er á slíku.

Tómas sagði að í staðinn fyrir að kaupa eða fá fyrirtæki hérlendis til að styrkja verkefnið hafi þeir ákveðið að kaupa flíspeysurnar í Nepal. Ástæðan fyrir þeirri ákvörðun var annarsvegar sú að flutningskostnaður er gríðarlega hár en þeir vildu einnig styrkja innviði í Nepal.

Söfnunin gekk vel og bæði einstaklingar og fyrirtæki styrktu verkefnið. Á föstudag voru svo afhentar níutíu flíspeysur til sjötíu barna og tuttugu kennara í skólanum Taksindu Monastery Lama School sem er fyrir munaðarlaus börn.

Auk þess fengu yfir tvö hundruð nemendur stílabækur og penna. Allt var þetta merkt íslenska fánanum og vakti mikla lukku. 

Stefna á að gefa öllum nemendum peysu

Tómas og Dendi eru þó hvergi nærri hættir. Þeir stefna nú á að kaupa flíspeysur á alla nemendur í þorpinu Dendli en til þess þurfa þeir að safna 4-500 þúsund krónum. Þá segir Tómas mikla þörf á skólatöskum sem þeir vonast einnig til að geta keypt. 

„Nepal er eitt af fátækustu löndum heims. Framleiðsla á hvern íbúa er í kringum 1.100 dollarar en 70.000 dollara á íbúa á Íslandi, segir Tómas. „Við erum því klárlega aflögufær, bæði einstaklingar og fyrirtæki.“

Hann segir fólkið í Nepal stálheiðarlegt og afar vinalegt, og því fái allir að kynnast sem ferðast um Nepal.

Tómas bendir á að ef fyrirtæki eða einstaklingar hafi áhuga á að styrkja verkefnið er hægt að gera það með því að leggja inn á eftirfarandi reikning: 0137-05-070295, kt. 110165-3829.