Sjö fyrirtæki hlutu viðurkenningu Ánægjuvogarinnar

Bjarki Sigurðsson skrifar 13. janúar 2023 09:36

Birna Magnea Bogadóttir, sölustjóri hjá Ikea. Ikea var eitt þeirra fyrirtækja sem hlaut viðurkenningu Ánægjuvogarinnar.

Sjö fyrirtæki hlutu í morgun viðurkenningu Íslensku ánægjuvogarinnar 2022 en alls voru 40 fyrirtæki mæld í fjórtán atvinnugreinum. Þetta er í 24. árið sem ánægja íslenskra fyrirtækja er mæld með Ánægjuvoginni.

Ánægjuvogin er mælikvarði á ánægju viðskiptavina sem mæld er reglulega yfir árið. Mælikvarðinn er notaður í samanburð fyrirtækja við samkeppnisaðila og á frammistöðu milli ára. Einkunnir félaganna sem mæld voru voru á bilinu 56,1 til 81,3 af hundrað mögulegum.

Átta fyrirtæki voru talin með tölfræðilega marktæku hæstu einkunnina á viðkomandi markaði. Þessi fyrirtæki teljast þar af leiðandi eiga ánægðustu viðskiptavinina í sínum flokki. Sigurvegararnir voru eftirfarandi:

Costco eldsneyti 81,3 stig meðal eldsneytisfyrirtækja
Nova 76,9 stig meðal fjarskiptafyrirtækja
Apótekarinn 75,3 stig meðal apóteka
IKEA 75,2 stig meðal húsgagnaverslana
Krónan 74,4 stig meðal matvöruverslana
Orka náttúrunnar 70,8 stig meðal raforkusala
BYKO 70,5 stig meðal byggingavöruverslana
Sjóvá 69,5 stig meðal tryggingafélaga

Efstu fyrirtæki á mörkuðum þar sem ekki var marktækur munur á efsta og næstefsta sæti fengu einnig viðurkenningu fyrir góðan árangur. Þau eru:

Heimilistæki 75,6 stig meðal raftækjaverslana
Play er í fyrsta skipti að fá mælingu með 72,1 stig meðal flugfélaga
A4 71,7 stig meðal ritfangaverslana
Smáralind 68,3 stig meðal verslunarmiðstöðva
Landsbankinn 66,3 stig meðal banka

Um framkvæmd könnunarinnar:

Prósent sá um framkvæmd mælinga sem fór fram frá maí til desember árið 2022. Könnunin var send í tölvupósti á könnunarhóp Prósents. Um 3.000 manna úrtak á hverjum markaði. 200-1.000 svarendur fyrir hvert fyrirtæki. Niðurstöður voru vigtaðar með tilliti til kyns, aldurs og búsetu þýðisins.

Ánægjuvogin samanstendur af þremur spurningum:

1. Á heildina litið, hversu ánægður(ur) eða óánægð(ur) ert þú með reynslu þína af [fyrirtæki]?

2. Hugleiddu allar væntingar þínar til [fyrirtækis] annars vegar og reynslu þína af fyrirtækinu hins vegar. Að hve miklu leyti uppfyllir [fyrirtæki] væntingar þínar?

3. Núna biðjum við þig um að ímynda þér hið fullkomna [fyrirtæki á viðkomandi markaði]. Hversu nálægt slíku fyrirtæki er [fyrirtæki]?

Neytendur Verslun Costco Íslenska ánægjuvogin