„Það er ekki eðli­­legt að það verði svona mörg slys“

Í sjónvarpsfréttinni má sjá hina þriggja ára Ragnheiði Nínu í skemmtigarðinum Rush fyrir stuttu að hoppa og skemmta sér. 

„Og er það bara að hoppa og hafa gaman, en svo bara gerist eitthvað. Virðist vera tempó vesen sem gerist. Hún er ekki að hoppa eitthvað svakalega. Það er eins og hún sé að koma af trampólíni þegar það heyrist smellur,“ sagði Margrét Erla Maack, móðir Ragnheiðar Nínu.

„Voruð þið kannski í Rush?“

Smellur sem boðaði ekki gott. Ragnheiður Nína fótbrotnaði og þarf að vera í gipsi fram yfir jól.

„Það sem kannski kom mest á óvart var að þegar farið var með hana upp á slysavarnarstofu þá var svolítið bara litið á klukkuna og sagt: Já það er sunnudagur og klukkan er ellefu, voruð þið kannski í Rush? Þannig það kom engum á óvart þarna að þetta væri eitthvað og svo þegar ég fór að tala um þetta á samfélagsmiðlum þá sé ég að barn vinkonu minnar Ásu, hún fótbrotnaði vikuna áður á sama stað.“

Engar tölur eru til um fjölda trampólínslysa hjá Bráðamóttökunni en læknir segir slysin kunnugleg.

„Því miður þá sjáum við þennan flokk af slysum svolítið hjá okkur á Bráðamóttökunni,“ sagði Hjalti Már Björnsson, læknir á bráðamóttökunni.

Meiðslin séu aðallega beinbrot og í einstaka tilfellum hryggáverkar. Allri hreyfingu fylgi slysatíðni og mikilvægt að fólk fari varlega. Alltaf ætti einn að hoppa í einu.

„Og sérstaklega hættulegt er ef það eru tveir að hoppa í einu af mismunandi stærð og þyngd.“

Gleðipinnar reka Rush og í samtali við fréttastofu segir markaðsstjórinn að tíðni óhappa sé mjög lág í ljósi fjöldans sem sækir garðinn. Reglum hafi verið breytt til að auka öryggi gesta og nú þurfi forráðamenn að fylgja börnum í svokallaða krakkatíma. Margrét segir að slys Ragnheiðar hafi gerst eftir að reglum var breytt enda hafi hún einmitt verið í þessum sérstaka krakkatíma. Með viðtalinu vill hún að foreldrar séu meðvitaðir um hættuna sem fylgt getur trampólínhoppi.

„Það er áhætta ef þú átt barn að vakna á morgnanna og fara út úr húsi en það er hægt að minnka alls konar áhættur. Ef það væru börn að fótbrotna með viku millibili í sundlaugum Reykjavíkur þá væri eitthvað gert,“ segir Margrét.

„Og maður er auðvitað látinn skrifa undir þegar maður kemur með barnið að þú berir ábyrgð á því, eðlilega. Það er mjög eðlilegt. En það er ekki eðlilegt að það verði svona mörg slys þarna, bara sem maður heyrir úr nærumhverfi sínu.“

Uppfært 16. desember klukkan 12:00:

Samkvæmt upplýsingum kom umrædd breyting á öryggisverglum er varðar aldurstakmark í Rush trampólíngarðinn til framkvæmda laugardaginn 10. desember. Slysin sem vitnað er til í fréttunum áttu sér stað fyrir þann tíma.