Innlent

Heiða Björg marði sigur á Rósu í formannsslag

Kolbeinn Tumi Daðason skrifar
Heiða Björg tekur við blómum úr hendi Söndru Ocares sem á sæti í kjörstjórn Sambands íslenskra sveitarfélaga.
Heiða Björg tekur við blómum úr hendi Söndru Ocares sem á sæti í kjörstjórn Sambands íslenskra sveitarfélaga.

Heiða Björg Hilmisdóttir, varaformaður Sambands íslenskra sveitarfélaga og borgarfulltrúi, verður næsti formaður Sambands íslenskra sveitarfélaga. Kosning fór fram undanfarnar tvær vikur en aðeins munaði þremur atkvæðum á formannsefnunum.

Auk Heiðu Bjargar bauð Rósa Guðbjartsdóttir, bæjarstjóri í Hafnarfirði, sig fram til að gegna embætti formanns næstu fjögur árin. Á kjörskrá voru 152 landsþingsfulltrúar og var kosningaþátttaka 98,03%. Heiða Björg hlaut 76 atkvæði eða 51,01%, en Rósa Guðbjartsdóttir hlaut 73 atkvæði eða 48,99%.

Heiða Björg mun taka við embætti af Aldísi Hafsteinsdóttur, núverandi formanni, á landsþingi sambandsins sem haldið verður á Akureyri dagana 28.-30. september. Á landsþinginu verður stjórn sambandsins kjörtímabilið 2022-2026 kjörin.

Heiða Björg er fædd og uppalin í Eyjafirði, en hefur búið í Reykjavík nær öll hennar fullorðinsár. Heiða Björg var kjörin varaformaður Samfylkingarinnar í febrúar 2017, hún hefur setið í borgarstjórn Reykjavíkur í níu ár og verið varaformaður stjórnar Sambands íslenskra sveitarfélaga síðustu fjögur ár.

Samfylkingin Sveitarstjórnarmál Vistaskipti

Mest lesið


Fleiri fréttir

Sjá meira


×

Mest lesið