Ís­lands­banki hagnaðist um 5,9 milljarða króna

Í tilkynningu bankans til Kauphallar segir að helstu ástæður góðrar afkomu séu sterk tekjumyndun, aðhald í rekstri og jákvæð virðisbreyting útlána. Hagnaðurinn á fjórðungnum er hálfum milljarði króna meiri en á sama tímabili í fyrra.

Þar segir að að hreinar vaxtatekjur hafi aukist um 21,8 prósent milli ára og hafi numið 10,3 milljörðum króna. Hækkunin skýrist af hærra vaxtaumhverfi og stækkun inn- og útlánasafns bankans.

Hreinar þóknanatekjur hafi aukist um 18,1 prósent og numið 3,4 milljörðum króna. Auknar tekjur í greiðslumiðlun, fjárfestingarbanka, verðbréfa- og gjaldeyrismiðlun og vegna útlána og ábyrgða hafi leitt hækkunina.

Í ljósi góðrar afkomu og væntinga fyrir síðari hluta ársins hefur leiðbeinandi tala fyrir arðsemi verið endurskoðuð upp á við og er nú yfir tíu prósent en var áður átta til tíu prósent. Jafnframt verður leiðbeinandi bil fyrir kostnaðarhlutfall nú 44 til 47 prósent , en var áður 45 til 50 prósent.

Íslandsbankafólk geti verið ánægt

„Við Íslandsbankafólk getum svo sannarlega verið ánægð með uppgjör annars ársfjórðungs þar sem hagnaður nam 5,9 milljörðum króna og var arðsemi 11,7% sem er yfir okkar fjárhagsmarkmiðum. Við sáum sterkan vöxt í tekjum bæði hvað varðar vaxta- og þóknanatekjur eða 21% á milli ára. Á sama tíma náðist raunlækkun kostnaðar um 5,9%. Kostnaðarhlutfall var 42,7% á tímabilinu sem er jafnframt umfram fjárhagsmarkmið bankans,“ er haft eftir Birnu Einarsdóttur, bankastjóra Íslandsbanka, í tilkynningunni.

Hún segir að útlánastarfsemi hafi verið lífleg á tímabilinu en að vænta megi að útlánavöxtur verði hægari á seinni hluta ársins vegna aðgerða Seðlabankans.

Tilkynningu um uppgjör Íslandsbanka má lesa í heild sinni hér.