Erfitt starfs­um­hverfi hamlar fjölgun heimilis­lækna

Þetta kemur fram í umfjöllun Fréttablaðsins í dag, þar sem rætt er við Steinunni Þórðardóttur formann Læknafélagsins. Steinunn segir erfiðu starfsumhverfi hér á landi um að kenna; álag sé mikið og verkefnin óljós. Þeir séu að sinna verkefnum sem aðrir læknar eða fagstéttir ættu að sinna.

„Þau lenda oft í að vera sálfræðingur, félagsráðgjafi og allt mögulegt fyrir fólk því það vantar fólk úr þeim stéttum á heilsugæsluna,“ segir Steinunn.

Sumir heimilislæknar hér á landi séu þannig með tvöfaldan eðlilegan fjölda skjólstæðinga en Svíar settu nýlega þak á leyfilegan fjölda skjólstæðinga. Þeir mega ekki lengur vera fleiri en 1.100 á hvern lækni. 

Hér á landi er ekkert slíkt þak. 

Í blaðinu kemur einnig fram að aðeins Grikkir og Pólverjar séu með færri heimilislækna en Íslendingar og almennt séð séu Vestur-Evrópuríki með um og yfir 100 heimilislækna á hverja 100 þúsund íbúa.

Staðan er þó enn verri hvað varðar barnalækna en þar er Ísland neðst á lista.

Steinunn segir að fjölga þurfi læknanemum hérlendis og laða læknanema heim eftir nám.