Oddvitáskorunin: Syndir, skýtur og semur ljóð

Hrafndís Bára Einarsdóttir leiðir lista Pírata á Akureyri í komandi sveitarstjórnarkosningum.

Ég heiti Hrafndís Bára og er Einarsdóttir. Fædd og uppalin í afdölum lengst utan við mannabústaði, sem afsakar allar mínar kenjar og kúnstir.

Dritaði sjálf frá mér þremur þokkalegum börnum, tók tvö upp í og stal einu. Kalla mig því í dag sex barna móður.

Ég safna að mér ómikilsvirtum diplómagráðum og titlast í dag leikkona og viðburðastjóri. Er hæfilega fær í hvorugu.

Ég trúi því einlæglega að heiminum yrði best borgið ef Auður Haralds væri heimsforseti og súrar lappir væru seldar í lúgujoppum.

Hver er fallegasti staðurinn á Íslandi?

Það er vonlaust að svara þessari spurningu. Ég ferðast mikið um landið og það er svo fjölbreytt og fallegt. Ekki bara náttúran heldur þau ólíku samfélagsmynstur sem þrífast við misjafnar aðstæður. Hér á Akureyri finnst mér Sílabásinn fallegastur. Hrafnkelsdalurinn, mín heimasveit er engri lík. Þá er ég nýbúin að skreppa til Grímseyjar og þar er eitthvað svo ótrúlega mögnuð náttúra og fólkið sem þar býr.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Umferðarljósin eru stórundarleg hér á Akureyri

Hvert er þitt uppáhalds áhugamál sem gæti þótt skrítið?

Ég hef mörg áhugamál sem sumum gæti þótt undarleg. Miðað við miðaldra konu með sæmilegan belg. Ég hef gaman af sjósundi og böðum í allskonar ám, vötnum og við fossa. Ég er líka skotveiðiáhugamanneskja. Ég er krossgátunörd og áhugamanneskja um kindur.

Þá hef ég gaman af ljóða- og vísnagerð.

Alla daga best að byrja

brýna raust og tuða vel.

Þrætur góðar kann að kyrja,

kjaftur hæfir minni skel.

Hafi ekkert áorkast

undrum skal það sæta

ef ekki dugir dágott kast

daginn til að bæta.

Hver eru þín minnistæðustu samskipti við lögregluna?

Þau eru svo mörg. Þessar elskur eru alltaf að stoppa mig. Ég hef nefnilega þann leiða löst að keyra of hratt. En ég svo sem man ekki til þess að þau hafi verið minnistæð. Nema fyrir veskið.

Hvað færðu þér á pizzu?

Skinku, ólívur, lauk og extra ost.

Hvaða lag peppar þig mest?

Dimma er pepp.

Hvað getur þú tekið margar armbeygjur?

Einn beygðan í hring! Sem er núll.

Göngutúr eða skokk?

Bæði gaman. En ef við erum að tala um hluti sem ég get framkvæmt án þess að enda örend í vegkanti með blóðbragð í munni og neyðarlínuna á hraðvali þá er það göngutúr.

Uppáhalds brandari?

Ég er að eðlisfari ekki fyndin kona.

Hvað er þitt draumafríi?

Almáttugur minn. Er það til? Allskonar ferðalög er fjör. Gott stopp í sveitinni með bækur og krossgátublöð er best. Tjaldið mitt og krakkarnir er dásemd.

Hvort fannst þér 2020 eða 2021 vera verra ár?

Bæði árin höfðu sína kosti og galla en almáttugur hvað ég sakna þeirra ekki. Það hefur ekkert með covid að gera.

Uppáhalds tónlistarmaður?

Það á að banna svona spurningar. Ég ætla samt að segja Svavar Knútur. Hann er svo mikið hjartagull.

Hvað er það skrýtnasta sem þú manst eftir að hafa gert?

Átti þetta ekki að vera eitthvað bara svona stutt og laggott? Ég hef gert svo ævintýralega marga og skrýtna hluti að ég veit eiginlega ekki hvar ég á að byrja. Ég er frekar opin manneskja svo ég hef t.d. margoft hýst allskonar fólk heima hjá mér sem ég finn bara einhversstaðar. Fólki finnst það skrýtið. Ég hef gefið heimilislausum síðasta peninginn minn og flíkurnar utan af mér. Fólki finnst það skrýtið. Er ekki bara svolítið skrýtið hvað við höfum tapað mikið mennskunni?

Ef það væri gerð kvikmynd um ævi þína, hver ætti að leika þig? Má vera íslenskur eða útlenskur.

Mér finnst það liggja í augum uppi að Ólafur Darri leiki mig. Já eða Birna Péturs. Hey! Birna Péturs OG Óalfur Darri.

Hefur þú verið í verbúð?

Nei.

Áhrifamesta kvikmyndin?

Síðasta veiðiferðin. Ég missi ennþá svefn yfir hrútnum sem var kýldur út í á.

Áttu eftir að sakna Nágranna?

Er ennþá verið að sýna Nágranna?

Ef þú yrðir að flytja úr þínu sveitarfélagi, hvert myndir þú helst vilja fara?

Vá ég veit það ekki. Heim í Hrafnkelsdal? Það eru svo margir staðir á landinu sem mig langar til að búa á. Allir eiga þeir það sameiginlegt að vera fámennir.

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

Út með jólaköttinn. Lag sem á miklu oftar við en margur vill viðurkenna.