Svekkjandi jafntefli hjá Inter

Inter Milan þurfti að sætta sig við 1-1 jafntefli á heimavelli gegn Fiorentina í Serie A, ítölsku úrvalsdeildinni í knattspyrnu. Fyrr í dag vann Napoli 2-1 sigur á Udinese.

Eftir markalausan fyrri hálfleik á San Siro í Mílanó voru það gestirnir sem brutu ísinn en miðjumaðurinn Lucas Torreira skoraði þá eftir aðeins fimm mínútna leik. 

Gestirnir héldu forystunni ekki lengi en aðeins fimm mínútum síðar tengdu vængbakverðir Inter-liðsins vel og sáu til þess að staðan var jöfn þegar 40 mínútur voru til leiksloka. Hægri vængbakvörðurinn Denzel Dumfries skoraði þá eftir sendingu vinstri vængbakvarðarins Ivan Perišić.

Það var svo á 66. mínútu þegar heimamenn héldu að þeir væru að fá gullið tækifæri til að taka forystuna. Vítaspyrna dæmd en eftir að myndbandsdómari leiksins skoðaði hana betur var ákveðið að snúa dómnum við og staðan enn 1-1.

Þannig var hún allt til leiksloka, lokatölur 1-1. Úrslitin sérstaklega slæm þar sem Napoli vann 2-1 heimasigur á Udinese fyrr í dag. Gerard Deulofeu kom gestunum í Udinese yfir en Viktor Osimhen skoraði tvívegis með skömmu millibili í síðari hálfleik og tryggði eins marks sigur Napoli.

Napoli er því í 2. sæti sem stendur með 63 stig eftir að hafa spilað 30 leiki. Inter er með 60 stig eftir að hafa leikið leik minna.