Hótar eigin leikmönnum og þjálfurum

Sindri Sverrisson skrifar 17. mars 2026 09:00

Bjarki Már Elísson og félagar komust í úrslitaleik HM félagsliða í haust en töpuðu þar í framlengdum leik gegn Barcelona og náðu ekki að verja titilinn sinn. Það var þó ásættanlegt að mati framkvæmdastjórans. EPA/MOHAMED HOSSAM

Framkvæmdastjóri ungverska handboltaveldisins Veszprém, sem Bjarki Már Elísson er á mála hjá, sparaði ekki stóru orðin í yfirlýsingu á vef félagsins og hafði í hótunum við leikmenn og þjálfara.

Framkvæmdastjórinn, Dr. Csaba Bartha, er hundóánægður með frammistöðu Veszprém í Meistaradeild Evrópu og greinilega þeirrar skoðunar að búið sé að setja svo mikla fjármuni í liðið að það eigi að berjast um Evrópumeistaratitilinn.

Hann kveðst búinn að upplýsa leikmenn og þjálfara um að þeim verði refsað, eins og sjá má í yfirlýsingunni hér að neðan, náist sett markmið ekki. Um þetta var fjallað á handbolti.is.

Þrátt fyrir glæsta sögu hefur Veszprém ekki enn tekist að vinna Meistaradeildina en komist í úrslitaleikinn fjórum sinnum. Bartha bendir í grein sinni á að árið 2024 hafi verið ráðinn þjálfari sem unnið hafi Meistaradeildina þrisvar sinnum, en það er Spánverjinn Xavier Pascual sem stýrði Barcelona um árabil.

Það er alvöru pressa á þjálfaranum Xavier Pascual.EPA/HANNIBAL HANSCHKE

Bartha segir alla ábyrgð á leikmannakaupum og sölum vera á höndum þjálfara og yfirmanns íþróttamála, ráðist hafi verið í mikil aukaútgjöld síðasta sumar og að 16 af 17 breytingum hafi verið að beiðni þjálfarateymisins. Aðeins brotthvarf Ludovic Fabregas, sem enginn beri ábyrgð á, sé þar undantekning.

Í því ljósi sé krafan meiri en sú að liðið komi haltrandi inn í útsláttarkeppni Meistaradeildarinnar, með því að enda í 5. sæti í sínum riðli, og nú sé fyrsta skref að slá út PSG í umspili um sæti í 8-liða úrslitum. Enn sé allt opið en náist ekki sett markmið þá verði svo sannarlega afleiðingar, bæði fyrir þjálfara og leikmenn.

Veszprém var einu marki frá því að komast í fjögurra liða úrslit Meistaradeildar Evrópu í fyrra, með Bjarka og þá einnig Aron Pálmarsson innanborðs, en tapaði gegn Magdeburg sem svo vann titilinn.Getty/Andreas Gora

„Mér finnst að nú sé þörf á beinni og afgerandi íhlutun af minni hálfu, en áfram ekki varðandi taktík eða æfingar. Í þessu ljósi hef ég tekið þá stjórnunarákvörðun að ef markmiðin sem sett voru sameiginlega í upphafi tímabils nást ekki, mun ég beita sameiginlegri ábyrgð og afgerandi refsingu, sem ég hef upplýst liðið og þjálfarateymið um,“ skrifaði Bartha og hélt áfram:

„Fyrsta verkefnið núna er að ná árangri í umspili Meistaradeildarinnar gegn PSG.

Væntingin gæti verið sterkari ákvörðun, jafnvel uppsögn þjálfarateymisins. Ég tel að nú verðum við fyrst að klára tímabilið, endanlegt mat er aðeins hægt að gefa með hliðsjón af úrslitunum. Það getur verið að vegna skorts á árangri þurfum við að taka alvarlegri ákvarðanir í sumar. Nú set ég pressu, og ef liðið stenst hana ekki, mun það hafa frekari afleiðingar.“

Ungverski handboltinn Meistaradeild Evrópu í handbolta karla

Mest lesið

Fleiri fréttir