Telja Írani að baki ógnandi tölvu­póstum til banda­rískra kjós­enda

Bandarískar leyniþjónustustofnanir sökuðu Írani um að standa að baki tölvupósta sem voru sendir kjósendum í nokkrum ríkjum og virtust eiga að ógna þeim til að kjósa Donald Trump forseta. Telja þær að bæði Rússar og Íranir hafi komist yfir gögn um kjósendur.

Kjósendur Demókrataflokksins í nokkrum lykilríkjum fyrir forsetakosningarnar í Bandaríkjunum eins og Pennsylvaníu, Flórída og Arizona hafa fengið ógnandi tölvupósta síðustu daga. Þeir eru sagðir eiga að vera frá hægriöfgasamtökunum Stoltu strákunum (e. Proud boys) og er kjósendum hótað að samtökin hafi upplýsingar um þá og þeim sé því hollast að kjósa Trump.

„Þið kjósið Trump á kjördag eða við komum á eftir ykkur,“ sagði í tölvupóstunum sem virtust koma frá raunverulegri vefsíðu öfgasamtakanna.

Chistopher Wray, forstjóri alríkislögreglunnar FBI, og John Ratcliffe, yfirmaður leyniþjónustustofnana Bandaríkjanna, sögðu stjórnvöld í Teheran ábyrg fyrir tölvupóstunum á sameiginlegum blaðamannafundi sem boðað var til með skömmum fyrirvara í gærkvöldi. Þeir kynntu ekki sönnunargögn fyrir þeirri niðurstöðu eða hvernig þeim tókst að komast að sekt Írans svo hratt, að sögn AP-fréttastofunnar.

Sögðu þeir að Íranir og Rússar hefðu komist yfir gögn um skráða kjósendur. Þar á meðal eru tölvupóstföng, flokksskráning, heimilisföng og stundum símanúmer. Slík gögn eru að sumu leyti aðgengileg hverjum sem er og ekkert kom fram á fundinum um að ríkin hefðu brotist inn í tölvukerfi til að komast yfir þau.

Rússar enn taldir stærsta ógnin

Ratcliffe hélt því fram að tölvupóstunum hafi verið ætlað að koma höggi á Trump forseta en skýrði ekki hvernig. Írönsk stjórnvöld hafa verið talin aftarlega á merinni í njósnum á netinu. Þeir hafa ekki áður reynt að hafa áhrif á traust bandarískra kjósenda á kosningum.

Alireza Miryousefi, talsmaður sendinefndar Írans hjá Sameinuðu þjóðunum, hafnaði því að Íran hefði reynt að ógna bandarískum kjósendum.

„Ólíkt Bandaríkjunum hlutast Íran ekki til í kosningum annarra ríkja. Heimurinn hefur orðið vitni að því örvæntingarfullum og opinberum tilraunum Bandaríkjanna til að efast um úrslitin eigin kosninga á hæstu stöðum,“ sagði Miryousefi sem virtist þannig vísa til ítrekaðra efasemda Trump forseta um lögmæti kosninganna í næsta mánuði.

Rússar brutust inn í tölvupósta Demókrataflokksins í aðdraganda forsetakosninganna árið 2016 og dreifðu einnig áróðri á samfélagsmiðlum sem var ætlað að sundra bandarísku þjóðinni, ekki síst í kynþáttamálum. Markmið þeirra var að hjálpa Trump að ná kjöri sem forseti, að mati bandarískra leyniþjónustustofnana.

Washington Post hefur eftir bandarískum embættismönnum að þrátt fyrir tilkynninguna í gær séu Rússar enn taldi helsta erlenda ógnin við kosningarnar í næsta mánuði. Sumir þeirra efuðust um fullyrðingar Ratcliffe um að Íranir reyndu að skemma fyrir Trump forseta. Ratcliffe hefur áður verið sakaður um að birta sérvalin gögn til þess að styðja við málflutning Trump um ýmis mál.

Svo virðist sem að aðeins sólarhringur hafi liðið frá því að löggæslustofnanir hófu rannsókn á tölvupóstunum þar til Wray og Ratcliffe sökuðu Írani um að standa að þeim. Washington Post segir birting á niðurstöðum leyniþjónusturannsóknar hafi aldrei gengið svo hratt fyrir sig. Fleiri mánuðir liðu frá því að rannsókn á afskiptum Rússa af kosningunum árið 2106 hófst þar til ríkisstjórn Obama sakaði stjórnvöld í Kreml opinberlega um það.