Land­læknir gefur út upp­lýsingar fyrir börn og ung­menni

Embætti landlæknis hefur gefið út upplýsingar sniðnar að börnum og ungmennum varðandi kórónuveiruna sem veldur sjúkdómnum COVID-19. Þar er að finna helstu svör við ýmsum spurningum sem gætu brunnið á ungu fólki og farið yfir helstu atriði til að hafa í huga.

Fyrsta tilfelli kórónuveirunnar greindist hér á landi í dag en um er að ræða karlmann á fimmtugsaldri. Sá hafði verið í skíðaferð á Norður-Ítalíu fyrr í mánuðinum með fjölskyldu sinni en þó ekki á svæði sem smit höfðu komið upp. Hann fór að veikjast nokkrum dögum eftir heimkomu.

Steinunn Anna Sigurjónsdóttir, sálfræðingur hjá Litlu kvíðameðferðarstöðinni, sagði í viðtali við Vísi í dag að það væri mikilvægt að foreldrar væru meðvitaðir um það hvort börn þeirra væru að hlusta á fréttaflutning um kórónuveiruna og fylgjast með umræðu um hana. Foreldrar þurfi að vera vakandi fyrir því hvort börnin hafi verulegar áhyggjur og þá leiðrétta mögulegar rangfærslur.

Sjá einnig: Svona á að bera sig að þegar rætt er við börn um kórónuveiruna

Hættustigi almannavarna var lýst yfir eftir að tilfellið hér á landi var staðfest. Skilgreiningin á hættustigi samkvæmt viðbragðsáætlun almannavarna vegna heimsfaraldurs er eftirfarandi:

Umtalsverðar hópsýkingar brjótast út hjá mönnum en þær eru enn staðbundnar. Veiran aðlagast mönnum í vaxandi mæli og umtalsverð hætta er á heimsfaraldri. Sýking kann að hafa verið staðfest hér á landi en lýsa má hættustigi þó sýking hafi ekki borist til landsins.

Sjá einnig: Hvað er hættustig almannavarna og hvað áttu að gera til að forðast smit?

Í upplýsingum landlæknis má finna grunnupplýsingar um kórónuveiruna. Þá má finna nánustu upplýsingar um þróun mála, viðbúnar og ráðleggingar á vef embættisins landlaeknir.is.

Hvað er kórónaveiran?

Kórónaveira er tegund af veiru sem getur valdið veikindum, sérstaklega hjá þeim sem eru ekki heilsuhraustir fyrir.

Hvernig veikindum veldur hún?

Kórónaveiran veldur veikindum sem svipar mjög til algengra kvefeinkenna, eins og hósta, hita og beinverkja. Veiran getur líka valdið alvarlegum veikindum eins og lungnabólgu.

Ef grunur vaknar um smit er best að fá ráðgjöf og leiðbeiningar í síma 1700.

Er kórónaveiran hættuleg?

Ástæðan fyrir því að öll lönd í heiminum fylgjast vel með kórónaveirunni núna er að það hefur greinst ný tegund af henni og mjög margir hafa smitast í Kína. Veiran hefur síðan ferðast frá Kína til fleiri landa.

Íslensk stjórnvöld, læknar, lögreglan og Rauði krossinn vinna saman að því að tryggja að sem fæstir smitist af henni á Íslandi, og að þeir sem smitast fái góða læknisaðstoð. Fáir af þeim sem smitast af veirunni verða mjög alvarlega veikir en það þarf að fylgjast með öllum sem greinast. Langflestir jafna sig og verða jafnvel lítið veikir.

Gæti ég smitast af kórónaveirunni?

Þeir sem hafa verið mjög nálægt einhverjum sem þegar er veikur vegna kórónaveirunnar, eða hafa snert smitað fólk, sofið í sama rúmi eða verið í sama húsnæði gætu átt á hættu að smitast.

Hvernig get ég forðast að smitast?

Mikilvægast er að þvo sér vel og oft um hendurnar, með vatni og sápu eða handspritti. Svo er góð regla að forðast náin samskipti við aðra sem eru með einkenni kvefs, eins og hnerra eða hósta. Ef þú þarft að hósta eða hnerra er betra að gera það í olnbogann en ekki í hendurnar eða út í loftið. 

Af hverju eru sumir með grímur?

Fólk sem þarf að vinna mjög náið með öðrum og hitta marga í vinnunni sinni velur stundum að vera með grímur, til dæmis hjúkrunarfræðingar, læknar og þeir sem hitta marga ferðamenn.