Varað við fljúgandi hálku á höfuð­borgar­svæðinu

Lögreglan á höfuðborgarsvæðinu varar við fljúgandi hálku sem er nú víða í umdæminu en töluvert hefur verið um árekstra í morgun sem má rekja til þessa.

Lögreglan vill því minna ökumenn, sem og alla aðra vegfarendur, á það að fara sérstaklega varlega í umferðinni í dag enda lúmsk hálka á götum, gangstéttum og göngustígum.

Um tíuleytið í morgun varð árekstur tveggja fólksbíla á gatnamótum Háaleitisbrautar og Kringlumýrarbrautar.

Samkvæmt upplýsingum frá umferðardeild lögreglunnar á höfuðborgarsvæðinu beygði annar bíllinn í veg fyrir hinn og voru tveir fluttir á slysadeild með minniháttar meiðsl.