Segir lögin úrelt því veðmálastarfsemi sé auglýst í gegnum Lengjuna

Jóhann Már Helgason, sérfræðingur um fjárhagsstöðu íslenskra knattspyrnufélaga segir lög um auglýsingar veðmálafyrirtækja hér á landi ekki halda vatni þar sem Lengjan fær að auglýsa eins og þeim sýnist. Hann segir þó Þórsara ekki hafa farið rétt að enda stangast gjörðir þeirra á við landslög.

Mál Þórs frá Akureyri og veðmálafyrirtækisins Coolbet hefur verið mikið í umræðunni undanfarna daga enda gerðust Þórsarar þar að öllum líkindum sekir um brot á landslögum. 

Eftir leik Þórs og Grindavíkur í Lengjudeildinni mættu Akureyringar með derhúfu merkta erlenda veðmálafyrirtækinu Coolbet í viðtöl á Fótbolti.net. Í kjölfarið kom upp að fyrirtækið hafði einnig fengið að auglýsa á ársmiðum Þórs.

Vísir hafði samband við Jóhann Már Helgason en hann gerði skýrslu um fjárhagsstöðu íslenskra knattspyrnufélaga síðasta vetur. Mætti hann síðan til Henry Birgis Gunnarssonar og Kjartans Atla Kjartanssonar í þættinum Sportið í dag í apríl síðstliðnum til að fara yfir stöðu mála hjá íþróttafélögum hérlendis.

„Ég held að þetta málefni Þórsara sé mjög skýr og góð birtingarmynd fyrir þá stöðu sem flestar knattspyrnudeildir eru í. Það er hart í ári og flestir styrktaraðilar halda að sér höndum. Á meðan eru erlend veðmálafyrirtæki sem vilja styrkja þessi félög en lagaumhverfið, sem að mínu mati er úrelt, leyfir það ekki. Það er því klárlega þessi freisting til staðar fyrir félögin að láta reyna á þessi lög, líkt og Þórsarar virðast hafa gert,“ sagði Jóhann Már þegar Vísir falaðist eftir hans skoðun á málinu.

„Þetta er samt alls ekki rétta skrefið að mínu mati, enda ólöglegt. Fyrir mér þarf knattspyrnuhreyfingin sem ein heild að ákveða hvort hún vilji gera slíka samninga og vinna þannig á málum gagnvart löggjafanum. Að mínu mati er því boltinn hjá félögunum.“

Jóhann telur veðmálafyrirtæki standa höllum fæti gagnvart Lengjunni sem virðist einoka íslenskan markað.

„Að mínu viti eru þessi lög úrelt því það er verið að auglýsa veðmálastarfsemi á Íslandi í gegnum Lengjuna og því halda ekki þau rök að þessar auglýsingar frá fyrirtækjum eins og Coolbet séu eitthvað verri en frá Lengjunni - þær eru grófari ef eitthvað er. Frá mínum bæjardyrum séð stendur þessi einokun Íslenskra Getrauna knattspyrnudeildum landsins fyrir þrifum, jafnvel þó allur hagnaður þeirra renni aftur til félaganna.“

„Það eru ekki bara íslenskir tipparar sem eru að veðja fótboltann hér á landi, heldur eru það líka einstaklingar úti í hinum stóra heimi og þeir skipta við þessa erlendu veðbanka sem þannig hafa tekjur af íslenskri knattspyrnu. Það eru verulega súrt í brotið að íslensk félög fái ekki hluta af þeim tekjum á sitt borð,“ sagði Jóhann að lokum um málið.