Ólafur tryggði Kristian­stad jafn­tefli í 74 marka Ís­lendinga­slag

Það var mikil dramatík er GOG og Kristianstad mættust í Meistaradeild Evrópu en liðin skildu jöfn í miklum markaleik, 37-37.

Gestirnir frá Svíþjóð voru sterkari í fyrri hálfleiknum og voru 19-15 er liðin gengu til búningsherbergja.

Danirnir komust betur inn í leikinn í síðari hálfleik og voru yfir er ein mínúta var eftir en Ólafur Guðmundsson jafnaði metin í 37-37 og þar við sat.

Óðinn Þór Ríkharðsson skoraði eitt mark úr tveimur skotum fyrir GOG en með liðinu leika einnig þeir Viktor Gísli Hallgrímsson og Arnar Freyr Arnarsson.

Teitur Örn Einarsson skoraði sjö mörk úr fimmtán skotum fyrir Kristianstad en Ólafur skoraði fjögur.

GOG er nú með níu stig í riðlinum eftir sjö leiki en þetta var fjórða stig Kristianstad sem er botni riðilsins.