Kane: Verður sárt í allt sumar

Harry Kane segir að það muni taka allt sumarið að jafna sig á vonbrigðunum eftir töpin tvö sem hann þurfti að þola á síðustu dögum.

Kane var í liði Tottenham sem tapaði úrslitaleik Meistaradeildar Evrópu fyrir Liverpool fyrir viku síðan og svo var hann mættur með enska landsliðinu í lokaúrslitakeppni Þjóðadeildarinnar þar sem England tapaði fyrir Hollandi í undanúrslitum.

„Þetta er mjög sárt,“ sagði Kane við BBC.

„Þessi vika hefði getað orðið allt öðruvísi og sem atvinnumaður í íþróttum þá er það sem þig dreymir um að ná í titla og vinna leiki.“

„Þetta mun verða sárt í allt sumar, svona vonbrigði eru ekki eitthvað sem þú getur bara hreinsað úr huganum. En það er mikilvægt fyrir mig og alla strákana að reyna að endurnæra líkama og sál eins vel og hægt er.“