Snjallsímabann tekið í gildi í grunnskólum Fjarðabyggðar

Nýjar reglur um notkun snjalltækja tóku formlega gildi í grunnskólum Fjarðabyggðar í dag. Reglurnar eru settar í því skyni, að hlífa börnum við þeim vandamálum sem fylgja aukinni snjalltækjanotkun, að því er fram kemur á vef sveitarfélagsins.

Notkunarreglurnar fela í megindráttum í sér að skorður eru settar við notkun eigin snjalltækja á skólatíma. Mælst er til þess að nemendur geymi tækin sín heima og að slökkt sé á þeim, séu tækin tekin með í skólann.

Áður en reglurnar tóku gildi, var snjalltækjakostur grunnskólanna í sveitarfélaginu bættur, keypt hafa verið rúmlega 500 tæki, spjaldtölvur og chromebook tölvur, og verður jafnframt unnið að því að bæta nettengingar á næstu vikum. Reglunum er því ekki síður ætlað að styðja við þróun kennsluhátta og auka fjölbreytni í námi en að reglubinda einkanotkun snjalltækja í skólatíma.

Notkunarreglurnar voru samþykktar af bæði bæjarráði og bæjarstjórn Fjarðabyggðar og hafa verið kynntar starfsmönnum, nemendum og forráðamönnum þeirra. Með nýjum reglum er jafnframt vonast til að jafnræði meðal nemenda aukist, nemendur nái enn betri einbeitingu og árangri í námi og félagsleg samskipti eflist.