Ey­þór leiðir en vill ekki stólinn

Hann hafði betur í oddvitaslag við Trausta Hjaltason og hlaut tæp 63 prósent atkvæða í fyrsta sætið. Heimildir fréttastofu herma að allar líkur séu á því að til standi að ráða Írisi Róbertsdóttur, bæjarstjóra í Eyjum síðastliðin átta ár, aftur í starfið. 

Fréttastofa hefur fjallað um væringar stríðandi fylkinga meðal Sjálfstæðismanna í Eyjum sem rekja má til klofningar H-listans frá lista Sjálfstæðisflokksins fyrir sveitarstjórnarkosningar 2018.

Með „ágætisvinnu í Ísfélaginu“

Eyþór segist ánægður með niðurstöðurnar en ætlar ekki að falast eftir bæjarstjórastólnum.

„Ég hef alltaf sagt það að ég er í ágætisvinnu hér í Ísfélaginu. Ég er ekki að sækjast eftir bæjarstjórastarfi. Við hópurinn sem leiðir listann förum bara yfir það og komumst að einhverri niðurstöðu þegar líður á vorið,“ segir hann.

Engar endanlegar ákvarðanir hafi verið teknar um bæjarstjóraefni listans.

„Það er ekkert slegið í pólitík.“

Mögulegar sviptingar á listanum

Aðspurður segist hann ekki átta sig á því hvort allir frambjóðendur þiggi sætin sín á listanum enda voru þeirra á meðal fulltrúar hinnar fylkingarinnar sem kennd hefur verið við Elliða Vignisson bæjarstjóra í Ölfusi sem um árabil var bæjarstjóri í Vestmannaeyjum.

„Það eru margir sem ná ekki markmiðum sínum í prófkjöri frekar en í prófkjörum oft á tíðum. Það eru allir bara held ég að meta sína stöðu í dag og vonandi erum við að fara að mynda sterkan og samhentan lista eftir nokkra daga. Ég sé ekki neitt annað í þessari stöðu,“ segir Eyþór.

Endanleg niðurstaða í efstu sætum prófkjörsins er eftirfarandi:

1. Eyþór Harðarson hlaut 715 atvæði eða 62,6 prósent

2. Trausti Hjarðarson hlaut 441 atkvæði eða 38,6 prósent

3. Aníta Jóhannsdóttir hlaut 488 atkvæði eða 42,7 prósent

4. Óskar Jósúason hlaut 504 atkvæði eða 44,1 prósent

5. Hildur Sólveig Sigurðardóttir hlaut 549 atkvæði eða 48,1 prósent

6. Kjartan Vídó Ólafsson hlaut 584 atkvæði eða 51,1 prósent

7. til 8. Margrét Rós Ingólfsdóttir og Rannveig Ísfjörð eru jafnar með 538 atvkæði eða 47,1 prósent