Félag í eigu Andra bætir við sig í VÍS

Eignarhaldsfélagið Eitt hótel, sem er í jafnri eigu Andra Gunnarssonar og Fannars Ólafssonar, en þeir eru á meðal hluthafa í fjárfestingarfélaginu Óskabeini, einum stærsta einkafjárfestinum í VÍS, hefur á síðustu vikum verið að bæta við hlut sinn í tryggingafélaginu.

Samkvæmt nýjum lista yfir alla hluthafa VÍS á Eitt hótel núna um 7,5 milljónir hluta, eða sem nemur um 0,4 prósenta eignarhlut í félaginu, en um miðjan síðasta mánuð átti félagið um 5 milljónir hluta. Óskabein, sem þeir Andri og Fannar eiga ásamt meðal annars Gesti Breiðfjörð Gestssyni, stjórnarmanni í VÍS og eiganda Sparnaðar, fer samtals með ríflega fjögurra prósenta hlut í tryggingafélaginu. Auk þess að vera í hópi stærstu eigenda VÍS í gegnum Óskabein eru Andri og Fannar einnig á meðal hluthafa í félaginu Tröllahvönn sem á fjórðungshlut í Keahótelum.

Hlutabréfaverð VÍS hefur lækkað um liðlega 16 prósent á síðustu tólf mánuðum og við lokun markaða í gær stóð gengi bréfa félagsins í 9,86 krónum á hlut.