Lögregla lýsir eftir fjórða manninum

Lögreglan á höfuðborgarsvæðinu óskar eftir að ná tali af mönnunum sem sjá má hér að ofan vegna máls sem hún hefur til meðferðar, og eru þeir vinsamlegast beðnir um að hafa samband við lögreglustöðina á Hverfisgötu 113-115 í Reykjavík í síma 444 1000.

Fyrir helgi auglýsti lögreglan að hún vildi ná tali af þremenningum en ljóst er að nú hefur einn bæst við í hóp þeirra sem auglýst er eftir.

Samkvæmt heimildum fréttastofunnar eru mennirnir grunaðir um að hafa stolið háum fjárhæðum af eldra fólki um þar síðustu helgi. Í öllum tilfellum nálguðust þjófarnir eldri konur í kringum verslanir.

Skúli Jónsson, yfirlögregluþjónn hjá lögreglunni á höfuðborgarsvæðinu, segir í samtali við Vísi að enginn hafi verið handtekinn í tengslum við rannsókn á málinu. Rannsókn málsins sé í fullum gangi.

Ef einhverjir þekkja til mannanna, eða vita hvar þá er að finna, eru hinir sömu einnig beðnir um að hringja í lögregluna, en upplýsingum má jafnframt koma á framfæri í tölvupósti á netfangið adalsteinna@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.