Utanríkisráðherra Kína hvetur norður-kóresk yfirvöld til að taka ákvörðun öryggisráðsins alvarlega

Utanríkisráðherra Kína, Wang Yi, hefur hvatt utanríkisráðherra Norður-Kóreu, Ri Yang, til að stöðva prófanir á kjarnorku og flugskeytum í höfuðborg landsins Pyongyang. Átti hann með honum fund á Filippseyjum í morgun. BBC greinir frá.

Öryggisráð Sameinuðu þjóðanna samþykkti einróma í gær refsiaðgerðir í formi viðskiptahafta á Norður-Kóreu vegna fjölda flugskeytaprófana. Hvatti hann Ri Yang til að taka ákvörðun öryggisráðsins alvarlega.

Þarfar refisaðgerðir

Wang Yi er sagður hafa hvatt til samræðna á milli ríkjanna og að hann hafi hvatt yfirvöld í Norður Kórey til að vera róleg og ekki að ögra alþjóðasamfélaginu með frekari prófunum. Þá sagði hann einnig að refsiaðgerðirnar sem samþykktar voru hafi ekki verð endanlegt markmið en þeirra hafi samt sem áður verið þörf miðað við aðstæður. Ekki hefur komið fram hverju Ri Yang svaraði.

Wang Yi hvatti sömuleiðis Bandaríkin og yfirvöld í Suður-Kóreu til að byggja ekki upp frekari spennu á milli landanna þar sem allt væri á suðupunkti eins og er.

Haft var eftir fulltrúa Bandaríkjanna í öryggisráðinu, Nikki Haley, að Norður-Kórea stæði nú frammi fyrir einum að ströngustu refsiaðgerðum sem nokkuð land hefði þurft að þola á tímum þessarar kynslóðar.

Bandaríkin umvafin eldi

Norður-kóresk yfirvöld hafa ekki sent frá sé yfirlýsingu vegna ákvörðunar öryggisráðsins. Hins vegar hefur BBC eftir fjölmiðli í Norður-Kóreu, Rodong Sinmun, sem sagði að ráðstafanir teknar af yfirvöldum í Bandaríkjunum myndu leiða til þess að Bandaríkin myndu verða umvafin ólýsanlegum eldi.

Málefni Norður-Kóreu verða frekar rædd þegar 27 lönd koma saman á ráðstefnu landa sem staðsett eru í Asíu. Þá hafa tíu lönd sem taka þátt í ráðstefnunni sent út frá sér yfirlýsingu þess efnis að þau hafi miklar áhyggjur af ástandinu í Norður-Kóreu og flugskeytaprófunum þeirra sem þau segja ógna friði og öryggi.